Sakop sa CSU gipusil patay

CEBU, Philippines – Patay ang usa ka sakop sa Civil Service Unit (CSU) human gipusil sa wala mailhing mamumuno diha sa Barangay Poblacion.

Giila ang biktima nga si Leonardo Lumokso, 58, sakop sa CSU nga taga lungsod sa Ginatilan apan nagpuyo sa Barangay Gaas lungsod sa Balamban.

Base sa imbestigasyon sa kapulisan sa Toledo nga sakay ang biktima sa gimanehong motorsiklo kuyog ang asawa nga si Cristina diha sa merkado publiko sa dakbayan.

Human nga nikanaog ang asawa sa biktima kalit lang nga niabot ang mamumuno  nga nagsul-ob og full-faced helmet nga kolor itom, brown nga jacket ug maong pants dayong pusil sa biktima tulo ka higayon.

Naigo sa tuo nga aping, wala nga dughan ug sa luyo nga bahin sa lawas ang biktima ug patay na pag-abot sa Toledo City Hospital. Samtang ang suspek daling nisibat palayo sa lugar nahitaboan.

Matud sa asawa sa biktima nga dugay nang nakadawat og hulga sa kinabuhi ang iyang bana, gani niadtong Nobiyembre 7, 2015 gipusil sa wala mailhing tawo ang biktima sa Sitio Kuros-Kuros,  Barangay Gaas apan wala maigo.

Padayong giimbestigahan sa kapulisan ang maong hitabo sa pagsuta sa motibo sa maong krimen. – /EIM) (BANAT NEWS)