4PS gilalisan sa Konseho sa Talisay
CEBU, Philippines – Wala aprobahi sa konseho sa Dakbayan sa Talisay ang resolusyon nga giduso ni Konsehal Valeriano Ylanan nga nagsuporta sa Pantawid Pamilyang Pilipino Program sa Department of Social Welfare and Development.
Kini human gihulagway ni Konsehal Aldin Diaz nga gisakyan lang sa pamolitika ang mao’ng programa. Atol sa regular session, si Ylanan niduso sa resolusyon nga nagpadayag nga siya ug si Mayor Johnny de los Reyes ang nisuporta sa mao’ng programa.
Si Diaz nipadayag sa iya’ng pagsupak tungod kay daan na kini nga programa sa nasudnong gobiyerno ug gani kini nakahatag na og daghang benepisyo sa labi’ng kabus nga kaigsuonan.
Gawas niana, si Diaz niklaro nga sila’ng mga politiko unta ang dili na lang mosagol sa mao’ng programa aron pamolitikahon.
Samtang si Konsehal Socrates Fernandez nibarug ug nipadayag sa iya’ng suporta sa baruganan ni Diaz.
Si Fernandez mao’y tsirman sa komitiba sa social services sa konseho.
Gumikan niini si Bise Mayor Romeo Villarante ang nipabotar kung kinsa ang pabor sa resolusyon ni Ylanan diin walo ang supak samtang duha lang ang uyon. (BANAT NEWS)
- Latest
