Kapuyo sa killer ni Montebon kasohan pud
CEBU, Philippines – Pasakaan sa kapulisan og kaso ang live-in partner sa suspek sa pagpatay sa 17-anyos nga si Karen Kaye Montebon niadtong nakalabay nga Septiyembre human nakakuha og testigos ang kapulisan nga aduna gyu’y kalabotan ang babaye sa mao nga krimen.
Matud ni Senior Superintendent Marlon Tayaba, ang hepe sa Criminal Investigation and Detection Group-7, nga ilang nahibaw-an gikan sa mga testigos nga human gikawatan ni Ruben Fernandez ang balay sa mga Montebon ug gipatay si Karen Kaye, nagkuyog ang suspek ug ang kapuyo nga si Jennalyn Soon misibat paingon sa Bohol.
Sa pagpatim-aw ni Soon sa kapulisan pipila ka adlaw human ang kamatayon ni Karen Kaye, kini mihimakak nga aduna siya’y kalabotan sa krimen ug gani, nangambot kung asa si Fernandez.
Apan aduna silay nakuhang mga testigos nga nihatag og pamahayag gikan sa lungsod sa Getafe, Bohol nga didto diay si Soon kuyog ni Fernandez human ang mao nga pagpangawat ug pagpatay.
Sigon pa ni Tayaba nga kuyog pud si Soon sa pagprenda sa mga kinawat gikan sa balay sa mga Montebon nga iPad ug relo.
Si Senior Superintendent Rey Lyndon Lawas, ang supervisor sa Special Investigation Task Group-Montebon, miingon nga sa una pa lang nga nagduda gyud sila ni Soon tungod kay siya ug si Fernandez ang unang nakita sa CCTV camera nga misulod sa balay sa mga Montebon.
Matud ni Lawas nga kinahanglan na gyud nga mapasakaan og kaso ang mga responsable sa mao nga krimen. (BANAT NEWS)
- Latest
