Terror attack

CEBU, Philippines – Kapin 120 ka mga tawo, kasagaran kabataan ang patay human sa nahitabong sagunson ug konektadong pagpangatake sa Paris sa nasud sa France kagahapon nga gibasol sa presidente sa maong nasud nga binuhatan sa Islamic State of Iraq and Syria (ISIS).

Mideklarar og tulo ka adlaw nga nasudnong pagbangutan si French President Francois Hollande human sa kamatayon sa mga Parisians nga kasagaran diha gipamusil sa mga popular nightsports, konsiyerto ug nanan-aw og soccer.

Ang maong pagpangatake gihulagway nga maoy kinagrabehan nga nasinati sa maong siyudad human sa Ikaduhang Kalibutanon Gubat , si Hollande ug ang kadaghanan sa mga lider sa kanasuran mikondenar sa maong pagpangatake sa mga terorista.

Sagad sa mga presidente sa mga nasud daling mipaabot sa ilang pahasubo sa France ug misaad nga motabang pagbuntog sa terorismo ug mihulagway nga walay luna karong panahona ang barbarong mga terorista.

Sumala pa sa report sa Associated Press, ang kinadaghan og namatay nga mga biktima nahitabo diha sa usa ka konsiyerto diin adunay American rock band nga nagpasundayag. Matud pa adunay teroristang nagsuot og explosive belts ug ni-hostage sa mga nanan-aw sa konsiyerto apan ang negosasyon nisangpot sa pagpabuto sa maong bomba.

Matud pa sa report, tulo ka suicide bombings ang nahitabo sa gawas sa national stadium atol sa soccer match tali sa French ug German national soccer teams.

Si Hollande nagtan-aw sa maong soccer match diha sa maong stadium dihang nahitabo ang pagpamomba sa gawas nga bahin niini ug  dali  siyang gi-evacuate palayo sa lugar.

Laing grupo usab ang mirakrak sa mga cafes sa gawas nga bahin diin adunay gihimong konsiyerto ug pagkahuman nanulod sa maong mga establisamento ug gipangrakrakan ang mga tawo sa sud, dihang nangabot ang kapolisan, tulo sa mga teroristang nagsuot og explosive belts ang nipaulbo sa ilang kaugalingon.

Laing grupo usab sa mga terorista ang nagpaulbo sa iyang kaugalingon diha sa Boulevard Voltaire duol sa music hall.

Human sa pagpangatake, walo ka mga gidudahang terorista ang napatay, apan ang pito kanila namatay gamit ang suicide bombs ug ang usa napatay sa mga polis nga niresponde sa lugar, sumala pa sa tigpamaba sa Paris prosecutors office nga si Agnes Thibault-Lecuivre sa report sa Associated Press.

Ang mga otoridad sa France padayon pa karong nangita sa uban pang mga suspek nga gituohang pabiling gawasnon.

Si Hollande mideklarar og state of emergency ug mimando pahugtan ang seguridad sa ilang nasud.  (BANAT NEWS)