‘Siomai cops’ giduphan sa vendor

CEBU, Philippines - Human nag-viral sa Facebook ang hulagway sa mga polis sa Waterfront Police Station nga gi-upload sa usa ka ‘concerned citizen’ kay matud pa wala namayad sa gikaon nila nga siomai, tindero sa siomayan mihimakak sa maong alegasyon.

Kagahapon sa buntag uban sa iyang misis miadto sa Waterfront Police Station si Renante Batucan, 38, tindero sa Siomayan diin nangaon sila si Police Officer 1 Policarpo Barliso, Police Officer 2 Jonathan Cabañero ug Police Officer 2 Lolito Bustria aron paglimpyo sa pangalan sa maong mga polis.

Matud ni Batucan, dugay na niya nga suki ang maong mga pulis ug mibayad gyud sila sa ilang gikaon niadtong adlawa.

Gusto niyang klaruhon ang maong nigawas nga viral video kay dili kini tinuod ilabi na nga gipasanginlan siyang namulong nga mga abusado ang maong mga pulis.

“Dugay na gyud na sila suki, nangaon sila pero namayad man, wala man ingon nga wala namayad dili man na tinuod. Nianhi lang ko ba para malimpyuhan pud ang ilang ngalan dili na tinuod ang naa sa Facebook,” sigon pa ni Batucan. Ang maong mga polis miatubang sa mga tigbalita mipadayag sa ilang dakong kasagmuyo tungod kay gihukman dayon sila sa mga netizens nga nikomentaryo ug ni-share sa maong video.

Ang maong mga pulis nahibulong niadtong Huwebes sa hapon gipatawag sila sa ilang hepe nga si Chief Inspector Jose Gesto ug didto nasayran nga nag-trending sila sa Facebook.

Matud ni PO2 Cabañero, sa wala pa sila nagsugod og kaon mibayad silang daan sa ilang pagkaon, nagtuo siya nga kadtong babayeng nag-upload sa picture nagtuo nga wa sila namayad kay namarog ra man dayon sila human og kaon ug nanglakaw.

Si Gesto mihulagway nga dili lang pagpakauwaw sa ilang pagka pulis ug sa ilang estasyon ang gihimo niadtong nag-upload sa picture kondili hasta ang PNP Organization.

“Actually mo-file gyud mi og kaso, infact amo ang gi-blotter kay nasakitan gyud ang atong mga pulis nganong giingon ana sila,” matud pa niya.

Suway nga gi-open og balik ang gi-post niadtong babaye lakip ang iyang Facebook account apan dili na kini makita. (Decemay P. Padilla/EIM)(BANAT NEWS)