Tulo patay sa panunggab ug pamusil

CEBU, Philippines - Tulo ka tawo ang patay sa managlahing insidente sa pagpamusil ug pagpanunggab dinhi sa Sugbo.

Sa Dakbayan sa Lapu-Lapu, patay nang napalgan nga may samad dinunggaban sa dughan ang usa ka wala mailhing babaye nga giabandonar sa pantalan sa Barangay Canjulao.

Matud ni Police Officer 3 Lydo Pinos, imbestigador sa Lapu-Lapu City Police Office- Homicide Section usa ka Roland Berame maoy nakadiskubre sa patay’ng lawas sa dihang padung na kining managat.

Ang biktima nga gibanabanang 30 ngadto sa 35 anyos , 5’0 ang gitas-on, nagsuot og puting long sleeves nga adunay gamay nga printang prutas nga strawberry ug pantalon.

Aduna kini samad dinunggaban sa walang bahin sa dughan ug hiwa sa walang kamot niini.  Ang kapolisan padayon pa sa ilang imbestigasyon sa maong krimen.

Samtang patay nang nakit-an ang usa ka ex-convict diha sa gihigdaan niining lantay sa Sitio Boundary, Barangay Tungkil, lungsod sa Minglanilla kagahapon sa buntag.

Ang biktima mao si Ceasario Bacus, 48, nagpuyo sa nahisgutang lugar kinsa nabantayan pa sa magtiayong Eduardo Binuya nga nag-agulo sa ibabaw sa ilang lantay ug gituohan lang nilang gidamgo, pagkabuntag na nila nadiskubrehi nga patay na diay kini.

Sa pagsusi sa kapolisan, nasuta nga si Bacus adunay samad pinusilan diha sa iyang ulo. Ang mga residente mibutyag nga alas-2 sa kaadlawon nakadungog sila og buto sa armas apan wala lang nila kini panumbalinga. Matud pa adunay hulga sa kinabuhi ang biktima.

Si Chief Insp. Franco Oriol, hepe sa kapulisan sa lungsod sa Minglanilla sa iyang text message miingon nga drug  related ang nahitabo sa biktima.

Matud pa nga mitug-an ang biktima sa iyang pamilya nga nameligro siya tungod sa kadako sa iyang utang kay wa siya maka-remit sa halin sa shabu ngadto sa iyang amo.

Ang biktima tulo na ka higayon   nga napriso  tungod sa kalambigitan niini sa pagpamaligya og ginadiling drugas ug nakagawas lang tungod sa piyansa.

Sa laing bahin, patay ang usa ka Aquilino Allanic,42, taga Tisa, Cebu City human kini gidunggab sa bana sa iyang ig-agaw nga si Glenn Alsola, 24, niadtong miaging gabii sa Barangay Cerdena, Malabuyoc.

Matud pa ni Police Officer 3 Ronyl Allera, desk officer sa Malabuyoc Police Station nga nahinabi sa Banat News Miyerkules dala ang usa ka baton nga may palaman nga espada, kitchen knife ug hunting knife gisulong sa suspek ang biktima ug gidiretso kini pagluba.

Ang suspek miangkon sa kapolisan sa nabuhat nga krimen kay matud pa naglagot na siya sa biktima nga bana sa iyang ig-agaw kay sigehan sila og hasol niini tungod sa panag-ilogay sa balay sa usa ka Leon Redido nga namatay na. (Christell Fatima Tudtud, Gabriel Bonjoc ug Bryner Diaz/EIM)(BANAT NEWS)