Negosyo sa butane nahulga

CEBU, Philippines - Nahulga ang negosyo sa butane canister nga gigamit na sa kapin usa ka milyon ka Sugbuanon sa ila’ng pagluto og pagkaon.

Si Ed Antiligando, sakop sa board of directors sa Cebu LPG Budget Gas Association, niingon nga nasubo sila tungod kay aduna na’y pipila ka local government units ang nipanday na og mga ordinansahon nga wagtangon na sa hingpit ang mga butane canisters.

Matud pa nga wala sila hatagi og kahigayunan nga madungog ang ilang sentimento.

Sumala pa ni Antiligando nga base sa talaan nga ilang gihuptan, mas nag-una sa hinungdan sa sunog ang faulty electrical wiring ug kandila ug dili ang butane canister.

Andam makigtagbo ang grupo sa kadagkuan sa mga hingtungdang ahensya aron tukion ug susihon ang ila’ng mga butane canisters tungod kay nisunod sila sa tukma nga proseso aron mahimong legal ang tanan.

Gipadayag ni Antiligando nga mas risgo sa mga butane canisters ang mga nagpahigayon sa backyard o garage type-refillers kay mao kini ang kasagaran sa disgrasya kay dili trained ang mga tawo nga nagtrabaho niini ug substandard usab ang mga materyales nga gigamit.

Si Antiligando nipadayag nga padayon pa sila karong mohimo og information drive sa mga angay ug dili angay nga buhaton sa butane canisters ug nagpahigayon usab sila og branding lakip ang tanang angayan buhaton sa pag-legalize na sa butane.  (BANAT NEWS)