Tag P500 madawat sa PWDs sa Talisay

CEBU, Philippines – Madawat na sa mga persons with disability (PWD) sa Siyudad sa Talisay ang tag P500 nga hinabang gikan sa panudlanan sa gobiyerno karong tapos tuig.

Kini human gipasar ang resolusyon ni Konsehal Socrates Fernandez, chairman sa committee on social services, atol sa sesyon kagahapon nga maghatag sa hinabang. Si Konsehal Dennis Basillote nisupak sa rason nga gusto niya’ng mahimo nga tag P2 mil ang madawat sa mga PWDs apan si Fernandez nipasabot nga samtang mao usab ang iya’ng hunahuna, siya nabalaka nga mahurot ang pundo sa dakbayan.

Si Konsehal Valeriano Ylanan nisugyot sab og tag P1,000.

Apan atol sa botasyon, mayoriya ang pabor sa tag P500. Matud ni Bise Mayor Romeo Villarante nga sunod tuig hayan ila’ng padak-an pa ang mahatag sa siyudad.

Si Niel Lasquites, presidente sa PWD, nagpasalamat sa konseho nga aduna sila’y madawat karong tuiga kaysa wala.

Ang PWD sa Talisay moabot na sa kapin usa ka libo. – /GMR) (BANAT NEWS)