Daghang lapso ang tambalanan

CEBU, Philippines – Mohimo og imbestigasyon ang Department of Health (DOH)-7 kabahin sa lain na usab reklamo batok sa usa ka pangpublikong tambalanan nga miresulta sa kamatayon sa usa ka bata.

Ang nakalas mao ang kapin usa ka tuig nga bata nga si MaryJane Bariquit, residente sa Sitio White Sand, Barangay Tuyan, Dakbayan sa Naga nga giingong nagsuka-kalibang ug namatay human matud pa wala atimana sa Minglanilla District Hospital kay wa kini nakapalit sa tambal nga ilang gireseta.

Si Dr. Jaime Bernadas, Regional Director sa DOH-7 mangayo og situational report ngadto sa chief of hospital sa Minglanilla District Hospital lakip na usab ni Dr. Cyntia Genesolango sa Integrated Provincial Health Office aron ilaha kining i-validate.

Atimanon gyud

Kahinumduman nga base sa gi-post sa concerned citizen sa iyang Facebook account matud pa ang bata wala giatiman kay walay ikapalit og tambal ug dextrose ang inahan kay kuwang ang kwarta.

Matud pa, kadtong nag-upload sa picture uban sa iyang hinigugma maoy nangusog aron maatiman lang ang bata nga gihulagway niini nga nagtinga na adtong tungura. “The doctor or any attendant, or any personnel in the emergency room shall attend to any patient without questions on whether he/she can afford to pay or not, the only questions maybe that will be ask is relevant to situation of the patient,” asoy pa ni Bernadas.

Si Gob. Hilario Davide, III nagkanayon nga si Mayor Lani Peña sa lungsod sa Minglanilla maoy mipahibalo kaniya kabahin sa hitabo.

Ang gobernador nagkanayon nga adunay nahitabong miscommunication tali sa ginikanan sa bata ug sa medical personnel.

Bati og pamatasan

Apan kun si Vice Gob. Agnes Magpale maoy pangutan-on, adunay dakong tulobagon si Genesolango tungod sa pagpabaya sa attending physician ug mga medical personnel ubos sa iyang responsibilidad.

Giklaro ni Magpale nga manubag ang maong mga medical personnel tungod kay dunay ordinansa nga ang mga bata nag-edad og usa ka tuig paubos libre kini sa tanang gikinahanglan sa pasyente gikan sa bayronon ug sa tambal.

Gipasalig ni Magpale nga manubag ang angay manubag sa maong hitabo ilabi na nga ang maong tambalanan makadaghan na niyang nadungog nga adunay daghang mireklamo tungod sa bati nga pamatasan sa mga kawani niini  ilabi na ngadto sa mga kabos.

Daghang lapso

Sa iyang bahin, si Genesolango mibutyag nga adunay daghang lapso siya nga nakita human niya nakaestorya ang mga personnel sa tambalanan nga ni-duty adtong adlawa. Sumala pa ni Genesolango, adunay tambal apan nagkuwang lang og dagom nga “gauge 26”  kay nahurot na kini atol sa pag-abot sa bata.

Apan matud niya adunay mga pamaagi aron makakuha og tambal ang usa ka pasyente, una pinaagi sa pagkuha sa botika sulod sa tambalanan ug kung sirado ang maong botika, mahimo nga ang mga nagdumala sa Emergency Room o nurse ang mokuha niini pinaagi sa paghuwam og yawe sa security guard.

Gibutyag usab ni Genesolango nga mahimo rang mokuha niini sa pribado nga botika sa gawas kay mahimo ra man sila ang mobayad pinaagi sa PhilHealth.

Nakurat usab si Genesolango kung nganong aduna dayoy ingon niadto kadaghang reseta nga gihatag ngadto sa bata ug mao kini buot niya nga klaruhon  sa duty physician nga si Dr. Agnes Ademano.

Nitabang

Sa laing bahin, nikabat na og hapit P10 mil ang nadawat sa pamilyang Bariquit gikan sa mga nagpakabanang katawhan human nila nabasa ang gi-post sa Facebook ni Cherry Cris Soberano.

Si Soberano ug ang iyang uyab maoy nitabang sa pamilya sa bata sa dihang wala kini atimana sa mga doktor kay way ikapalit og tambal. Matud pa ni Soberano adunay nidonar og P6 mil nga usa ka Tina Michelle nga taga Dumanjug apan atoa na magpuyo sa Hong Kong, samtang ang uban nihatag apan wala na magpaila.

Gibutyag usab ni Soberano, tanan mga tawo nga nipadayag sa ilang tinguha nga motabang sa pamilya iya nang gitambagan nga diretso nga kontakon ang pamilya sa bata.

Si Mayor Peña sa iyang bahin nibutyag nga mohatag og ayuda ang lungsod kun modangop sa iyang buhatan ang pamilya, gimandoan usab niya ang mga nagdumala sa tambalanan magtinarong sa ilang trabaho ug di pasagdan ang mga pasyente.

Ang bata wala pa mahinayon paglubong kagahapon.  – Brenda Batuto, Decemay Padilla ug Renan Alangilan/EIM) (BANAT NEWS)