Nanigbas og polis napusilan

CEBU, Philippines – Nalandig sa tambalanan ang usa ka 46 anyos nga lalaki nga gidudahang sabog sa ilegal nga drugas human kini napusilan sa paa sa sakop sa Special Weapons and Tactics dihang kini nanghagis sa mga silingan diha sa sitio Panaghiusa, barangay Basak San Nicolas ning dakbayan sa Sugbo.

Ang napusilan mao si Rolando Hortillano, nagpuyo sa maong dapit samtang ang nakapusil nga polis mao si Senior Officer 4 Leovil Singson sakop sa SWAT sa Cebu City Police Office (CCPO).

Sumala pa ni Senior Inspector Regino Maramag Jr., hepe sa Mambaling Police Station nga nahinabi sa Banat News gialarma si Hortillano tungod kay nisaka kini sa atop sa ilang balay nga nagdala’g sundang ug ice pick.

Ang mga mirespondeng polis ug iyang mga kabanay ingon man si Konsehal Dave Tumulak misuway pakig-estorya kaniya aron malinawon kining motahan apan wala gayod kini nanaog.

Walay gipangayo si Hortillano apan mibahad kini nga iyang tigbason ang moduol kaniya ug iyang dunggabon iyang kaugalingon.

Naabtan pa og pipila ka oras ang negosasyon hangtud nga nagkilom-kilom na lang maong gisaka kini ni Singson apan tunga-tunga pa lang siya sa hagdan gisugat siya og tigbas ni Hortillano duha ka higayon apan wa makaigo hinungdan nga kini gipusil sa paa.

Natagak gikan sa atop si Hortillano ug gitabangan pagkupot sa ubang mga polis diha sa ubos ug daling gidala sa tambalanan. Matud pa ni Maramag, ang ginikanan sa suspek mibutyag nga duha ka adlaw nang way katulog ang ilang anak.

Kasong direct assault, alarm and scandal ug attempted homicide ang gikatakdang ipasaka batok sa suspek. – /EIM) (BANAT NEWS)