Basura sa Talisay gipasagdan na?

CEBU, Philippines - Nakapangutana si Konsehal Edward Alesna sa siyudad sa Talisay kung hain ang tigkolekta sa basura tungod sa nagkadaghang sagbot sa dakbayan.

Sigun pa ni Alesna nga adunay daku nga garbage truck nga gipalit ang siyudad apan siya wala mahibawo kun unsa ang ila’ng gibuhat.

Si Alesna nagkanayon nga nag-abot gyud ang mga basura sukad pa niadto’ng piyesta sa niagi’ng buwan dayun na sa adlaw sa mga kalag ug Santos.

Gipahibawo sab ni Alesna nga ang elevated garbage bin nga gibutang sa taytayan sa Lawaan 2 ang gitumba sa pagduda nga wala nahimuot ang katawhan nga nagtan-aw sa nagtipun-og nga basura.

Apan si Edwin Nierves, pangulo sa garbage collector, niingon nga wala naapektuhi ang ila’ng pagkolekta sa basura.

Gani 18 ka garbage trucks ang nagdagan matag adlaw sa pagkolekta sa basura.

Iya’ng gipasabot nga gitumba ang basurahan tungod kay ila kini’ng gibalhin og butang.

Si Mayor Johnny de los Reyes nibutyag sa mga tigbalita kaniadto nga posible’ng mahugaw ang tibuok Talisay tungod sa paglaslas sa konseho sa gipangayo nga budget niini.

Apan si Alesna niklaro nga gilaslasan nila ang budget sa mayor apan wala nila laslasi ang budget sa basic services sa siyudad labi na ang pagkolekta sa mga basura.

"Ang ako lang mao nga hipuson gyud ang basura," asoy pa ni Alesna.

Si Kapitan Teodoro Belleza sa Poblacion nipasabot nga guba ang truck nga mokolekta sa mga basura niadto’ng nilabay nga adlaw hinungdan nga wala gyud kini matagad.

Tinguha usab nila karon ang pagbalhin sa basurahan layo sa plaza isip tubag sa hangyo sa mga mag-jogging. (Gabriel C. Bonjoc/GMR)(BANAT NEWS)