Davide nidepensa sa p80m
CEBU, Philippines - Gihulagway ni Gobernador Hilario Davide III nga misleading ug malisyoso ang pamahayag sa iya’ng kaatbang nga si kanhi bokal Winston Garcia labot sa pagkuha og consultancy services sa duha ka proyekto sa Kapitolyo.
Gikwestiyon ni Garcia ang P80 milyones nga procurement sa consultancy services nga naglakip sa P57 milyones alang sa pag-andam sa detailed architectural ug engineering plans sa 12-story building sa Resources Center for Disaster Risk Reduction ug P26 milyones alang sa development sa disaster risk reduction-climate change adaptation and contingency plan.
Si Garcia nihulagway nga “unnecessary” ug “Napoles-type scam” ang mao’ng mga proyekto.
Apan si Davide nipasabot nga ang mao’ng consultancy services “necessary” ug “above board” ug lakip sa Six Key Agenda sa administrasyon karon sa probinsiya kabahin sa disaster preparedness ug investment promotion.
“How can these consultancies be anomalous? Only scandalous and shortsighted people can see it that way. People with anomalous minds, used to anomalous ways can attribute anomalous motives to others,” matud ni Davide.
Matud niya nga gipaubos nila sa lawom nga pagtuon ang major capital outlay sa proyekto. Ang gobernador nipasabot nga gi-outsource nila ang proyekto tungod kay ang competency sa engineering department ubos lang sa horizontal designing sama sa pagtukod ug pag-ayo sa mga karsada ug ang ila’ng kasinatian sa vertical development o pagpatukod og mga building kutob lang sa 2-storey school buildings.
“I would like to assure the Cebuanos that the proposed building will never be a white elephant. Never Again,” matud ni Davide.
Dugang sa gobernador nga kung si Garcia ang makadaug sa umaabot nga eleksiyon, makapahimulos pa kini sa mao’ng proyekto. (Brenda D. Batuto/GMR)(BANAT NEWS)
- Latest
