Dinakpan namatay sa presinto sa Cordova

CEBU, Philippines – Patay na nga nahidangat sa tambalanan ang usa ka tawo nga unang gidakop sa kapolisan tungod sa paghupot og shabu human sa nahitabong ginukdanay ala-una  pasado ang takna sa miaging Domingo sa kaadlawon diha sa sitio Bliss, barangay Ibabao, Cordova.

Si Police Officer 3 Vilma Degamo sa Cordova Police Station miila sa namatay nga dinakpan mao si Nicanor Tapara, alyas Niki, 44, nagpuyo sa maong dapit kinsa nasakmitan sa kapolisan og unom ka gagmay nga  paketeng shabu.

Matud pa ni Degamo, ang ilang hepe nga si Senior Inspector Alexander Nuñez uban sa mga sakop nagpatrolya sa lugar niadtong tungora dihang ilang nalabyan ang grupo sa mga lalaki nga nagtapok.

Sa pagduol sa mga polis nabantayan ang usa kanila nga mikaratel og dagan palayo  apan naabtan sa mga polis.

Matud pa nga nikatkat kini sa usa ka kongkretong paril aron unta nga makaikyas, apan sa paglayat niini sa pikas nga bahin gikatahong nitugpa sa puthaw nga kuptanan sa bomba sa tubig.

Apan bisan pa niini, nakabarog gihapon kini ug nakadagan apan naapsan sa mga mirespondeng mga polis.

Ang suspek daling gidala sa presinto apan pag-abot sa maong buhatan gikatahong kalit kining nakuyapan  hinungdan nga ilang gidala sa Lapu-Lapu City Hospital apan gideklarar kini sa mga doktor nga dead on arrival.

Si Degamo miingon nga girekomendar nila sa pamilya nga ipa-otopsiya ang patay’ng lawas sa biktima aron pagtino kun dunay foul play sa kamatayon niini. (Romeo T. Limpangog/EIM)

Dul-an P300mil shabu nasakmit

Nasakmit sa kapolisan ang mokabat sa P296,692 nga kantidad sa gituohang shabu gikan sa duha ka tawo nga ilang nadakpan sa buy-bust operation diha sa dalan Juan Luna Extension, barangay Poblacion, dakbayan sa Danao.

Si Police Officer 3 Roselo Campo sa Danao Police Station miila sa nadakpan nga mao sila si Jovinal Buot, 45, ug Enrique Prieto,33, parehong nagpuyo sa maong dapit. Matud pa ni Campo dugay na nilang gipanid-an ang mga suspek una pa gihimo ang operasyon nga miresulta sa pagkasikop sa duha. Nakuha gikan kang Buot ang usa ka dakong paketeng shabu nga mokabat sa 2.25 gramos ang gibug-aton samtang kang Prieto nakuha ang tulo ka paketeng gidudahang shabu.

Samtang nadakpan usab sa buy-bust operation sa kapolisan sa Medellin si Lyndon Pagobayan, alyas Lyndoy, 25, taga sitio Garahe, barangay Poblacion sa maong lungsod.

Si Senior Police Officer 1 Ryan Castro sa Medellin Police Station miingon nga ang team nga gipangulohan sa ilang hepe nga si Inspector Fermin Doque  ang nakadawat na og mga taho labot sa ilegal nga kalihokan sa maong suspetsado sa maong dapit hinungdan sa gilusad sa operasyon.

Nasakmit gikan sa maong dinakpan ang 11 ka paketeng shabu. – /EIM) (BANAT NEWS)