‘Pusher’ napusilan patay

CEBU, Philippines – Patay ang usa ka gidudahang drug pusher samtang nasikop ang tulo ka tawo ug naluwas usab sa kapolisan ang duha ka manag-agaw nga menor de edad nga ilang drug runners kagahapon sa buntag diha sa barangay Macaas, Catmon.

Gideklarar nga dead on arrival sa Sogod District Hospital si Zalde "Kabaw" Bravo, samtang nasikop sila si Anthony Arizo Grape, Salome Chan Torbiso ug Racquel Capote, 19, samtang na-rescue ang duha ka manag-agaw nga nag-edad og 17 ug 16 anyos.

Sumala pa ni Senior Inspector Leo Logroño, team leader sa Provincial Anti-illegal Drugs Special Operations Task Group nga ang operasyon  pinasikad sa search warrant nga giisyu ni Judge Wilfredo Navarro sa Regional Trial Court Branch 19 sa dakbayan sa Sugbo.

Sumala pa ni Logroño dihang ila nang gihatud ang warrant nibunot sa iyang kalibre .45 nga pistola ug nipabuto ngadto sa mga polis si Bravo maong napugos sila pagpusil niini sa iyang paa.

Ang kapuyo ni Bravo nga si Torbiso ug si Grape nga gikatahong nagbahig og shabu niadtong tungora naigking ug nanagan kauban ni Capote ug sa duha ka minor apan naapsan sa mga polis.

Nakuha gikan sa balay ni Bravo ang usa ka dakong putos,12 medium packs ug 10 ka gamay nga putos sa gituohang shabu nga mokabat og 90 gramos nga mobalor og kapin sa P1 milyon, drug paraphernalia ug kalibre .45 nga pistola.

Gidala pa unta nila sa Sogod District Hospital si Bravo apan gideklarar na kini nga dead on arrival.

Si Torbiso nagdumili sa pagluwat og pamahayag samtang si Grape ug iyang kapuyo nga si Capote nangangkon nga nangatulog lang sila niadtong tungora dihang kalit silang gidakop.

Ang duha ka manag-agaw nga menor nga babaye ug lalaki miingon nga gikuha sila ni Bravo sa ila ug gipasaligan nga pahumanon sila og eskwela bugti sa pagtabang-tabang sa balay sa suspek.

Ang duha ka menor i-turn-over sa Department of Social Welfare and Development samtang ang tulo nga nasikop pasakaan og kasong paghupot og ginadiling drugas.

Si Bravo maoy gitumbok nga numero uno sa listahan sa mga drug personalities sa Catmon ug nangangkon kini nga siya kanhi sakop sa New People's Army ug gireklamo na usab nga responsable sa mga extortion activity sa maong lungsod.

Samtang sa lungsod sa Consolacion, tulo ka mga lalaki ang nadakpan sa buy-bust operation nga miresulta sa pagkasakmit sa balor P160 mil nga shabu sa miaging adlaw.

Si Senior Inspector Wilson Abot nga maoy hepe sa kapolisan sa lungsod maoy nangulo sa operasyon diha sa sitio Simboryo, barangay Tayud nga miresulta sa pagkasikop kang Apojado Pepito, 27, nakuhaan og pito  ka gagmay nga paketeng shabu ug tulo ka medium packs niini nga adunay mokabat 11.95 gramos nga  shabu.

Laing nadakpan mao sila si Marciano Semense, 53, ug Randy Anding, 38, pulos taga sitio Lamac, barangay  Yati sa mao gihapong lungsod ug nasakmit  og unom ka paketeng shabu.  (BANAT NEWS)