Mga polis sa Catmon kompiyansa ra
CEBU, Philippines - Subli’ng gipahinumdum sa direktor sa Police Regional Office-7 sa tanan niya’ng sakop nga dili gyud mokompiyansa kung adunay alarma nga tubagon aron dili mahimutang sa peligro.
Kini human sa nahitabo sa mga sakop sa Catmon Police Station nga napatyan og usa samtang duha sab ang patay sa gikaingkwentro nga armado’ng mga tawo.
Matud ni Chief Supt. Prudencio “Tom” Bañas nga angay huna-hunaon sa mga polis nga usa ka delikado nga trabaho ang ila’ng gisudlan ilabina kung ang alarma tumong sa gabii o ang ila’ng respondehan alarma sa armado’ng tawo.
Gipahinumduman na sab ni Bañas ang direktor sa kapolisan sa probinsya sa Sugbo nga dili gyud molugak sa ila’ng pag-alerto sa ila’ng trabaho.
Dugang sa opisyal nga kung basehan ang inisyal nga nadawat nga report sa mao’ng hitabo, kini maingon nga adunay sipyat ang gihimo nga pagresponde sa kapolisan.
“I look into the report of the chief of police, based on the initial report I would consider na there would have been lapses on the part of our responding policemen. Ang importante dun alert ka,” dugang pa ni Bañas.
Hinuon gipaneguro ni Bañas nga ila gyud pangitaon ang laing kauban sa grupo hangtud nga sila madakpan ug mapaatubang sa balaud.
Tungod sa hitabo, plano sa opisyal nga ipaubos sa “refreshing course” ang mga polis may labot sa pagresponde sa mga alarma ilabi na kung armado ang suspek ug kung unsa’y angayan nga buhaton aron maseguro nga dili na masubli pa ang naasoy nga hitabo. (Jojo C. Ugdol/GMR)(BANAT NEWS)
- Latest
