Sistema sa pag-inspeksyon sa bagahe giusab

CEBU, Philippines - Sistema sa pagsusi sa mga bagahe sa mga tugpahanan sa nasud giusab tungod sa isyu sa “tanim bala” nga nag-viral karon ang mga reklamo diha sa social media ug nakaguba na sa imahe sa nasud ug nakahatag og kahadlok sa mga biyahidor.

Sa gipagawas nga transcript sa press conference sa NAIA niadtong Miyerkules diha sa Official Gazette sa gobiyerno,  ang Department of Transportation and Communications ug Manila International Airport Authority mipahibalo kabahin sa mga kausabang ilang gihimo.

Si Secretary Joseph Emilio Abaya miingon nga mihimo sila dayon og imbestigasyon kabahin sa sagunson nga mga pagkasakmit sa mga bala diha sa NAIA ug sa mga nanggawas nga mga reklamo bahin niini.

Nakontrobersiya kini human nga adunay mga pasahero ang nireklamo nga gikilkilan sila sa mga airport personnel bugti nga sila buhian ug makapadayon sa ilang mga biyahe.

Matud pang Abaya, niadto pang  tuig 2008, daghan nang mga Filipino ang nasakmitan og bala diha sa NAIA, apan kasagaran kanila gihimong anting-anting.

Apan bisan pa niini, tan-awon gihapon nila kun makamugna ba kini og kadaot ug makamatay pa o dili, dunay uban basiyo na lang, samtang dunay uban ang ulo na lang niini ug duna say uban nga kompleto pa gyud aduna basiyo, ulo ug pulbora maong peligro kini sa mga pasahero.

“When a passenger is found with a live bullet, it is confiscated. Kinukuha po ‘yun kasi hindi po ito puwedeng dalhin sa loob ng eroplano. He is detained and if evidence is strong, a case will be filed against that particular person found with that particular item in possession,” matud pang Abaya.

Apan iyang giklaro, kun ang anting-anting nga bala dili na makamugna og kadaot o di na makapatay, ilaha lang kining kompiskahon og papadayunon sa iyang biyahe ang pasahero.

Aron masigurong wala nay mananom og bala aron kilkilan ang pasahero wa nay screeners nga mahimong makagunit sa mga bagahe nga makit-an sa x-ray machine nga adunay kontrabando.

Ang tag-iya na niini  mismo maoy mohabwa sa iyang mga gamit ug kun mamatud-an nga buhi kining bala o ilegal ang nasakpan sud sa iyang bagahe i-turnover sila sa kapolisan aron pasakaan og kaso.

Sa kaso usab sa mga overseas Filipino workers nga nakuhaan og mga bala, si Abaya miklaro nga daan nang gipaubos sa seminar ang mga OFWs kabahin sa mga gidili diha sa mga tugpahanan.

Gibutyag usab ni Abaya, kasagaran sa mga nakuhaan og bala miangkon nga nagdala sila niini, apan aduna gyuy pipila nga nabiktima gyud sa pagpangilkil.

Si Abaya midugang nga aduna nay mga kawani sa NAIA nga gipangrelibohan ug gipasakaan og kaso tungod sa pagpangilkil subay sa reklamo sa mga pasaherong nasakpang nagdala og bala nga miinsister nga wala silay dalang bala sa ilang bagahe apan gipangwartahan sila sa mga kawani sa airport.

“So we are currently investigating at least on the Red de Guzman case. Cases have been filed against the OTS [Office for Transportation Security] personnel because clearly there were violations of procedures and that is currently … once that is disposed off, we will clearly show to media the results of that investigation,” matud pang Abaya.

Sumala pa niya, responsibilidad sa gobiyerno ug sa mga otoridad nga aksyonan kun adunay mga akusasyon pinaagi sa pagsusi kun giunsa gyud pagkahitabo.

Giklaro niya nga ilaha kining buhaton alang sa kaluwasan ug pagwagtang sa kabalaka sa mga Pilipino, ikaduha, pangitaon sa gobiyerno kun asa ang buslot ug pangitaan og solusyon nga di na kini masubli pa ug ang ikatulo mao ang pagsigurong di na matagak pagbalik gikan sa FAA Category 1 Status ang NAIA nga dugay kaayo nilang nabawi pagbalik. (BANAT NEWS)