Robredo nagpasalamat sa Alayon party

CEBU, Philippines - Si Liberal Party vice presidential candidate, Kongresista Leny Robredo sa Camarines Sur, nihangop sa pagsuporta sa Alayon Party kaniya ug kang LP standard-bearer Mar Roxas II.

Kagahapon si Robredo kinsa uban ni kanhi senador Francisco “Kiko” Pangilinan, nibisita sa Kapitolyo ug nakigdungan og paniudto kang Gobernador Hilario Davide III ug sa mga mayor sa kalungsuran.

Matud ni Robredo nga talagsaon nga adunay mga lider sa lokal nga andam mohiklin sa politika bisan og lahi-lahi ang partido alang sa kahiusahan.

Ang mga mayor sa una’ng distrito nga kaalyado sa Alayon nga sila si Mayor Valdemar Chiong sa dakbayan sa Naga, Nicepuro Apura sa dakbayan sa Carcar ug Lionel Bacaltos sa lungsod sa Sibonga ang nitambong sa paniudto.

Sa laing bahin, si Bise Mayor Ramon “Red” Durano VI sa dakbayan sa Danao ug pangulo sa Bakud Party nagkanayon nga wala pa sila’y gisuportahan nga presidential ug vice presidential candidates.

Matud ni Durano nga niadto’ng eleksiyon sa 2013, ang Bakud nakig-alyansa sa LP apan sa pagkakaron wala kini  kaalyansa nga national party. Giklaro ni Durano nga sa lokal mosuporta sila kang Davide sa LP ug Bise Gobernador Agnes Magpale sa Bakud.

Si Durano nagkanayon nga buot nila’ng ila-ilahon ang mga kandidato una sila modesisyon.

Dugang ni Durano nga ang pagbisita nila ni Senador Grace Poe ug Senador Chiz Escudero sa dakbayan sa Danao sa nilabay’ng buwan nagpahigayon lang sila og konsultasyon sa mga mayor sa distrito.  (BANAT NEWS)