Nagsunog sa kaugalingon?

CEBU, Philippines - Wala gisalikway sa kapolisan ang posibilidad nga nagsunog sa kaugalingon ang usa ka tawo sa sitio Lunas, Sudlon 1, dakbayan sa Sugbo.

Matud ni Chief Inspector Michael Angelo Beltran sa Pardo Police Station nga ilang nasayran sa kabanay sa biktima nga si Dominic Uy, taga barangay Labangon, nga mohimo gyud kini og paghikog sa iyang kaugalingon kung adunay kapildehan nga maangkon.

Tanang anggulo lakip ang posibilidad nga paghikog ang gitutukan sa kapolisan tungod kay dili pa kini dugay nga gibuwagan sa iyang uyab nga nagpuyo sa maong lugar.

Si Beltran nibutyag nga wala usab sila’y nakit-an nga adunay lama sa kamot sa biktima gumikan sa paghigot niini ngadto sa kahoy subay sa pangangkon niini nga kini gibitay una gidauban.

Gibutyag usab ni Beltran nga ila karon gilantaw ang pangangkon ni Uy nga gisunog siya sa tulo ka tawo nga kanhi niya kauban sa grupo hinungdan nga wala pa sila nahuman sa gipahigayung imbestigasyon tungod sa paglili sa tanang anggulo may kalabutan sa insidente. (BANAT NEWS)