PCL: Rama may mahimo pa sa SB-1

CEBU, Philippines - May mahimo pa si Cebu City Mayor Michael Rama batok sa mga konsehal nga nagdumili sa pagpasar sa supplemental budget-1.

Kini ang gipadayag sa pipila ka opisyal sa Philippine Councilors League nga nia sa Sugbo alang sa Capacity Assistance to Local Legislators Initiatives Needed in Governance (CALLING) Training and Workshop Conference.

Matud ni Konsehal Jaime Cembrano Jr., sakop sa Advocacy Committee sa PCL ug representante sa Butuan City, nga lisud na gyud ang sitwasyon ilabi na nga hapit na ang eleksiyon tungod kay ang ubang opisyal tumong nila ang pagbabag sa plano sa mayor.

Lima na ka higayon nga napakyas ang konseho sa dakbayan sa Sugbo sa pagpasar sa SB-1 nunot sa pagbabag sa mayoriya sa mga sakop nga habig sa Bando Osmeña-Pundok Kauswagan.

Matud ni Cembrano nga mapasabot ni Rama ngadto sa katawhan nga giduso nila ang SB-1 apan pilde lang gyud sila sa ihap sa botasyon. Sugyot ni Cembrano nga patambungon sa sesyon ang mga tawo nga apektado sa SB-1 aron makapadayag kini sa ila’ng gibati.

Matud usab sa chairman sa PCL Advocacy Committee gikan sa Muntinlupa City, Konsehal Raul Corro, nga mahimo usab ni Rama ang pagdangop sa buhatan sa Department of Interior and Local Government nga mao’y mohusay, modangop sa korte o ang pagpasabot na ngadto sa katawhan sa sitwasyon aron mao’y mohukom sa adlaw sa eleksiyon.

Ang PCL nagpahigayon sa tulo ka adlaw nga training seminar sa ila’ng mga sakop.

Matud ni Konsehal Jesse Cruz sa Mandaluyong City nga ang mga konsehal tudloan sa pag-andam og mga policy pinaagi sa dali ug epektibo nga pamaagi. Sa Phase I sa mao’ng programa mao ang refresher training nga naglakip sa “quick tools” nga sayon kaayo’ng ma-apply sa miyembro sa pagbuhat nila og balaud.

Sa Phase 2 mao ang plano sa PCL sa pagtukod og advocacy centre ug mag-umol og iSUPPORT nga usa ka online platform nga magkonektar sa mga local council ug PCL advocacies.

Ang mga schedule sa seminar sa Visayas sa Nobiyembre 4-6 Crown Regency Hotel sa dakbayan sa Sugbo; Nobiyembre 10-12 sa Century Park Hotel sa Manila ug Nobiyembre 25-27 sa Waterfront Insular Hotel sa Davao City. (BANAT NEWS)