Biktima sa Yolanda padayon

CEBU, Philippines - Duha ka tuig human nilabay ang super typhoon Yolanda sa amihanang bahin sa Sugbo nagpadayon pa gihapon ang Relief and Rehabilitation Unit (RRU)- Cebu sa ilang pakiglambigit sa mga biktima samtang ang lalawigan mohimo og caravan aron sila kumustahon karong adlawa Nobiyembre 5.

Ang RRU-Cebu mao ang humanitarian arm sa Archdiocese of Cebu nga gipangulohan ni Fr. Charles Jayme, Chairman sa Rehabilitation sa Archdiocese of Cebu nga nanghatag og ayuda sa mga biktima bisan og motangkod na kini sa duha ka tuig karong Nobiyembre 8.

Niadtong nilabay nga bulan nagpahigayon og ground breaking sa Maricaban sa isla sa Sta. Fe ang RRU-Cebu alang sa himuong relocation site nga papuy-an sa usa ka gatos ka pamilya.

Nagpadayon usab sila karon og site development plan sa maong lugar aron ipresentar sa iyang pagtambong sa session sa konseho karon adlaw nga Lunes.

Base sa ilang assessment , singko  ngadto sa diyes porsiyento na lang sa mga nabiktima sa bagyo ang wala pa hingpit nga nakabawi sa ilang panginabuhian ug dunay uban nga namiya na gyud sa maong lugar.

Giklaro ni Jayme nga kadto lamang mga nabiktima nga wala makadawat og Emergency Shelter Assistance (ESA) sa gobiyerno ang ilang tabangan aron gayud matagaan ang kadtong wala maabti og hinabang.

Si Jayme nibutyag nga bisan og moduha na ka tuig human niigo ang Yolanda daghan pa gihapong mga tawo ang padayong mihatag og ayuda ngadto sa mga biktima.

Ang Provincial Disaster Risk Reduction and Management Office (PDRRMO) mopahigayon karong adlawa hangtud ugma og caravan nga may tema nga “The Key to Shared Accountability and Commitment.”

Gustong susihon sa lalawigan ang mga nahimo ug kinahanglan pang buhaton aron matabangan ang mga naapektohan sa bagyo.

Ang mga lugar nga gikatakdang suroyon mao ang lungsod sa Santa Fe, Bantayan, Madridejos, San Remigio, Tabuelan, Tuburan, Sogod, Borbon, Tabugon, Bogo, Medellin ug Daanbantayan nga maoy nagrabehan.

Usa ka photo exhibit usab ang ibutang ugmang adlawa diha sa Kapitolyo.