Kapitolyo di mobayad sa WT
CEBU, Philippines – Dili gyud mobayad si Gobernador Hilario Davide III sa gimando sa Korte Suprema nga pagbayad sa WT Construction sa pagpahuman sa Cebu International Convention Center sa niagi’ng administrasyon.
Si Davide kauban ni Bise Gobernador Agnes Magpale nisusi kagahapon sa CICC nga nagusbat sa niagi’ng linog ug bagyo sa hinapos nga bahin sa 2013.
Matud ni Davide nga moduso usab sila og motion for reconsideration kun masuta nila nga sayop ang desisyon sa korte sa pagmando nga pabayran ang P5.8 milyones nga tubo sa additional work sa CICC nga niabot na sa P257.41 milyones ang kinatibuk-an.
Gikwestiyon ni Davide ngano’ng ang iya’ng administrasyon ang pabayaron sa sayop sa nilabay’ng administrasyon.
Gibutyag ni Davide nga sa iya’ng nakuha’ng kopya sa desisyon sa Korte Suprema nalakip niini nga wala’y bidding ang additional work. Kini ang hinungdan nga si Davide nipasangil kang kanhi gobernador Gwendolyn Garcia nga gi-misled ang katawhan sa iya’ng mga pamahayag nga wala’y sayop ang pagpatukod sa CICC. – /GMR) (BANAT NEWS)
- Latest
