43 toneladang basura nahipos, kapin 800 naisyohan og tiket

CEBU, Philippines – Miabot ngadto sa 43 toneladang basura ang nahipos sa mga tinugyanan sa Department of Public Service sa dakbayan sa Sugbo sulod sa duha ka adlaw nga kasaulogan ang Adlaw sa mga Santos ug sa mga Kalag. Matud pa ni Engr. Rolando Ardosa, pangulo sa DPS, dili ra iglayo ang gidaghanon sa basura nga ilang nahipos sa nilabay nga tuig sa samang kalihukan.

Ang maong mga basura nahipos gikan sa mga dagkong sam-ang nga nahimutang sa Calamba, Pardo, Carreta, A. Lopez Labangon, Queen City Memorial Garden, Cabantan, Cempark ug uban pa.

Wala hinuon kaayo naglisod sa paghipos ang DPS sa mga basura tungod kay daghan man gipakatap nga mga sakop sa City Environmental Sanitation and Enforcement Team (CESET) ug Barangay Environmental Officers (BEO) sa mga sam-ang nga nitabang pagbantay ug nag-superbisar kun asa ilabay ang mga basura.

Lakip sa ilang gipatuman ang pagbahig sa mga basura nga malata ug dili malata.

Dugang pa ni Ardosa, tanang mga basura ila na karon gipanglabay ngadto sa Consolacion dumpsite.

Samtang ang pangulo sa CESET Grace Luardo nibutyag sa Banat News nga niabot ngadto sa 854 ka mga tawo ang naisyohan og citation ticket atol sa duha ka adlaw nga kasaulogan.

Matud pa ni Luardo, 267 ang nakalapas sa City Ordinance 1361 “An ordinance establishing a system of garbage collection, imposing fees therefor, and appropriating funds and for other related purposes” ug 587 ang nakalapas sa City Ordinance 2241 kon ang “The Comprehensive Anti-Smoking Ordinance of the City of Cebu.”

Sumala pa ni Luardo, mas daghan sila og naisyuhan karong tuiga itandi sa niaging tuig tungod kay aduna may daghan niini nga wala masayod sa kahigpit sa ordinansa sa siyudad.

Ang mga naisyuhan adunay dili taga Cebu City o dugay nang wala na nagpuyo dinhi nga nibisita aron managkot sa ilang mga mahal sa kinabuhi nga mitaliwan na sa laing kalibutan.

Gibutyag usab ni Luardo, ubay-ubay na sa mga naisyuhan nila og ticket ang nakabayad na sa ilang obligasyon ug duna nay napulo ka mga tawo ang nipahigayon og community service.

Gipahibalo ni Luardo nga kung moabot sa napulo ka adlaw dili i-settle sa mga naisyuhan og citation ang ilang multa pasakaan gayud kini nila og kaso. – /EIM) (BANAT NEWS)