Walo angol sa butane

CEBU, Philippines – Walo ang naangol ug nalandig sa tambalanan human mibuto ang gilimpyohan nila nga mga butane canisters diha sa Greyhound Subdivision, barangay Kinasang-an ning dakbayan sa Sugbo kagahapon.

Kini ang gitug-an ni Senior Fire Officer 3 Pier Angelo Abellana sa Pardo Fire Station nga nahinabi sa Banat News human nila nadawat ang alarma alas 2:39 sa hapon.

Giila ang mga nalandig sa tambalanan nga sila si Fedelino Amaroche, 18, Jimboy Aranas, 31, Rick Orcullo, 34, Elpidiap Banduco, 19, Romnick Pia, 21, Dexter Gora, 22, ug duha ka wala pa maila sa kabomberohan.

Sumala pa ni Abellana nga ang tag-iya sa maong mga gibaligyang butane mao si Amor Pelenia.

Sa inisyal nga imbestigasyon sa kabomberohan nasayran nga samtang naglimpyo sa mga butane canisters ang walo ka mga trabahante ni Pelenia,  kalit lang mibuto ang mga sudlanan hinungdan nga naangol ang mga trabahante.

Nagduda si Abellana nga gumikan sa kandila nga nagsiga nga anaa sa altar o ba kaha adunay nagsigarilyo duol sa nahimutangan sa canisters maong miulbo kini.

Gisusi karon sa mga imbestigador sa BFP kung nag-refill ba sila si Pelenia og butane gamit ang peligro kaayong liquefied petroleum gas (LPG).

Daan nang mipasidaan ang kabomberohan nga peligro ang pag-refill sa mga butane canisters tungod kay wala kini gidesinyo ang sudlanan

Si Abellana miingon nga 2nd hangtud 3rd degree burns ang naangkon sa mga trabahante nga gidala sa usa ka pribadong tambalanan.

Gipasabot ni Abellana nga mismo ang kapitan sa barangay  miingon nga wala silay naisyu nga permit ngadto ni Pelenia aron makabaligya kini og butane canisters.

Girekomendar ni Abellana nga kompiskahon ang mga canisters sa butane ni Pelenia ug pasirad-an gayod ang maong negosyo. – /EIM) (BANAT NEWS)