Gabii sa mga Santos gipahigayon

CEBU, Philippines – Gipahigayon sa Archdiocesan Shrine of San Roque, Mambaling, dakbayan sa Sugbo ang Gabii sa mga Santos subay sa kalihukan sa pagtak-op sa bulan sa Santo Rosario.

Ang matag sitio nga sakop sa parokya adunay representante sa mga santos nga niabot og dul-an usa ka gatos ka nagkadaiyang Santos.

Sila gipilian ngadto sa trese kabuok nga labi’ng nindot diin gipatubag sila sa mga birtud ug kinaiya sa mga Santos nga ilang girepresentahan.

Gikan sa trese nipili sila og tulo nga mananaug diin tanan nakadawat og consolation, mga imahe sa mga Santos, samtang ang tulo ka mananaug nakadawat og imahe sa nagkadaiyang klase sa Santos ug cash prize.

Ang niguwa nga mananaug mao si Santa Pilomena nga gidala ni Junalyn Resuento sa Birhen sa Lourdes Chapel Community, Alaska Centro.

Ang kura paruko sa parokya sa Archdiocesan Shrine of San Roque, Fr. Miguelito Sarmago, nipadayag nga naandan na panahon sa kalag-kalag ang kalihukan sa ungo-ungo o pagpanghadlok hinungdan nga kiwaw kaayo kung ang simbahan wala’y buhaton nga pag-alkontra niini hinungdan nga sila nipahigayon sa gabii sa tanang balaan human sa gipahigayon nga Living Rosary.

Gibutyag ni Sarmago nga pinaagi sa mao’ng kalihukan, madasig ang mga tawo sa pagpuyo sa kinabuhi ug birtud sa mga Santos ug dili angay nga magsige lang og kahadlok.

Si Sarmago nipadayag nga atol sa kasaulogan sa mga kalag nga unta dili mawani ang katuyoan nga kadtong nag-una sa pagtaliwan sa laing kalibutan nga sila mahilangit pinaagi sa pagsakripisyo ug pag-ampo ug ipatigbabaw kanunay ang buhat sa kaluoy. – /GMR) (BANAT NEWS)