‘Liquid shabu’ gipalusot sa CPDRC

CEBU, Philippines – Usa ka bisita nga babaye sa Cebu Provincial Detention and Rehabilitation Center (CPDRC) ang nadiretso hinuon og katingkagol sa maong prisohan human kini masakpi nga misuway og palusot og liquid shabu niadtong Sabado sa ala 1:45 sa hapon. Ang jail warden sa CPDRC, Romeo Manansala miila sa suspetsado nga si Liberty Cabrada Antiporta, 38-anyos taga lungsod sa Cordova.

Matud ni Manansala nga niadtong higayona si Antiporta moduaw unta kini sa iyang kapuyo nga si Reynaldo Baguio kinsa napriso usab sa pagkalambigit niini sa ginadiling drugas.

Giingong si Antiporta sa pagbisita unta niini nagdala og litson nga manok ug walo ka hotdog sandwiches nga gisulod og plastik.

Isip pamaagi sa CPDRC gihiling ni Prison Guard 1 George Veloso ang mga dala ni Antiporta.

Matud ni Manansala nga nahibulong si Veloso nga usa sa mga hotdog sandwiches gahi ang sud hinungdan nga giukab nila kini.

Giingong nakita ni Veloso ang gamay nga plastik nga botelya nga sama sa “vial” nga gisuksok daw palaman sa hotdog hinungdan nga gipangutana niini si Antiporta bahin niini.

Matud pa nga miinsister kini nga facial cleanser ang sulod sa maong gamay’ng botelya ug aksidente lang kini nga nasukip diha sa hotdog sandwich.

Gidala ni Veloso ngadto kang Manansala ang maong gamay’ng botelya ug gipaubos si Antiporta sa inspeksyon diha sa female inspection room.

Si Antiporta hugtanon sa iyang pamalibad nga facial cleanser ang sulod sa gamay’ng botelya hinungdan nga gipa-laboratory test kini ni Manansala ug nasuta nga “liquid shabu” diay kini ug ang sukod niini 6.8 ml.

Human mahibaw-i nga ginadiling drugas ang sulod sa gamay’ng botelya gitanggong dayon si Antiporta ug gikatakda kining pasakaan og kaso  karong adlawa ngadto sa piskalilya.

Tungod sa maong insidente idili na usab ang mga facial cleansers  tugotang ipasulod diha sa CPDRC. – /EIM) (BANAT NEWS)