2.5 magnitude nga linog mitay-og sa Sugbo

CEBU, Philippines – Nakasinati og hinay nga linog ang pipila ka mga lugar dinhi sa Sugbo gikan sa dakbayan sa Danao, paingon sa Lapu-Lapu City ug sa siyudad sa Sugbo niadtong Domingo sa gabii.

Ang buhatan sa Philippine Institute of Volcanology and Seismology (PhiVolcs) mitala og 2.7 magnitude nga linog alas 10:50 sa gabii diin ang epicenter niini nahimutang sa kadagatan unom ka kilometro sa amihanang sidlakang bahin sa Danao City.

Matud pa nga tectonic ang origin niini nga dunay gilawmon nga walo ka kilometros hinungdan nga bisan kun hinay ang magnitude nabatyagan gihapon kini sa pipila ka mga tawo nga wala maglihok atol sa pagtay-og. Nasayran nga nakasinati og intensity 3 ang Danao City, ug intensity 2 sa Liloan, Consolacion, siyudad sa Sugbo ug Lapu-Lapu.

Samtang, ang nasinating pag-uwan sukad niadtong adlaw’ng Biyernes posibleng masinati hangtud karong adlawa gumikan sa North Easterlies Wind.

Nagkanayon si Romeo Aguirre, weather specialist sa PAGASA-Mactan walay laing weather disturbance nga ilang nasigpatan nga mosulod sa Philippine Area of Responsibility base na sa ilang 5-day forecast.

Gipasabot ni Aguirre, ang bugnaw nga hangin gikan sa amihan nga moagi sa init nga katubigan sa Pasipiko, makamugna og pag-ulan kun moigo sa kayutaan pinaagi sa localized thunderstorm.

Napanglantawan usab nga sugod sa Miyerkules makasinati ang Kabisay-an ug Mindanao ug ubang bahin sa Luzon og init nga panahon gumikan sa El Niño.

Apan gumikan sa hanging amihan ug pagsugod sa winter season sa amihanang bahin sa kalibutan mamenusan ang kainit ug mabatyagan gihapon ang kabugnawon sa kaadlawon. – /EIM) (BANAT NEWS)