Kanhi polis, laing 6 sikop sa drugas

CEBU, Philippines – Nasikop sa kapolisan ang usa ka kanhi polis nga gituohang drug pusher sa pag-served sa search warrant kagahapon sa buntag sa barangay Looc Norte, Asturias.

Ang nasikop mao si Virgilio Jesus Quiachon kinsa matud ni Senior Inspector Narciso Abapo nga gipanid-an nila sulod sa tulo ka semana una gi-aplayan og search warrant sa sala ni Judge Hermes Montero sa Branch 59 sa Toledo City.

Matud niya nga sa wala pa nila gi-implementar ang search warrant, aduna pa sila’y nakit-an nga pipila ka lalaki nga gikan sa balay sa suspek nga posible’ng gikan namalit og drugas.

Wala na nakasukol ang suspek ug nasikop kini sa mga polis sulod mismo sa iya’ng kwarto diin nagpasad ang daghang drug paraphernalia ug gamit alang sa pagputos sa ginadili’ng drugs ug gidudahan nga sa iya’ng kwarto magbahig ang suspek.

Nakuha gikan sa kwarto ang upat ka medium pack ug 24 ka gagmay nga pakete sa gidudahang shabu nga balor og kapin sa P70 mil.

Ang suspek giingong nataktak sa serbisyo tungod sab sa sama’ng kaso ug ikaduha na niya ka higayon nga nadakpan sa ilegal nga drugas.

Pasahero sa bus

Sa laing bahin, nadakpan sa checkpoint sa kapolisan sa dakbayan sa Bogo ang usa ka pasahero sa bus padulong sa lungsod sa Daanbantayan alas 3 pasado sa niagi’ng hapon human nasakmit sa kapolisan ang putos sa shabu ug drug paraphernalia. Si Police Officer 3 Elymar Mendoza sa Bogo City Police Station niila sa nadakpan nga si Ricky Gelig, 43, taga Maya, lungsod sa Daanbantayan.

Matud ni Mendoza nga si Gelig namatikdan nga wala nahimutang sa iya’ng gilingkuran ug nisuway paglabay sa gidala nga gamay nga putos apan dali kini’ng gidakop.

Nasuta nga shabu ug drug paraphernalia ang sulod sa putos hinungdan sa pagkatanggong sa suspek sa detention cell sa kapolisan sa dakbayan sa Bogo ug gikatakda’ng pasakaan og kaso.

Buy-bust operations

Samtang nadakpan sa buy-bust operation ang gikatahapang pusher og shabu sa sitio Sampanguita, Lamac, Consolacion alas 7 pasado sa niagi’ng gabii ug nasakmit ang P67,845 nga kantidad sa shabu.

Si Police Officer 1 Retchie Guilleran sa Consolacion Police Station niila sa nadakpan nga si Roy Cabahug Lobaton, 21, ulitawo nga nagpuyo sa mao’ng dapit.

Matud ni Guilleran nga notado’ng pusher og shabu ang dinakpan nga nakaaghat sa ila’ng hepe nga si Senior Inspector Wilson Abot sa pagpasiugda og buy-bust operation hinungdan sa pagkasikop niini.

Laing tulo usab ka suspetsado’ng pusher ang nadakpan sa buy-bust operation sa dalan Juan Luna, Poblacion, dakbayan sa Danao ug nasakmit ang mokabat sa P59,000 nga kantidad nga shabu.

Si Police Officer 3 Fiel Restauro ang nangulo sa operasyon ug nasikop ang tulo nga sila si Rolando Montes, 38; Creymond Kim Cazona, 21, ug Crisologo Montes, 36, pulos taga dalan Rizal, Poblacion.

Natanggong usab sa Toledo City Police Station ang usa ka amahan human nasakmitan og gituohang shabu sa buy- bust operation  sa sitio Upper Maraat, Matab-ang. Si Benjamin Halangdon Toquero, 30, adunay kapuyo, ug duha ka anak ang gisikop sa kapolisan.

Usa ka poseur buyer ang nipalit sa suspek gamit ang P200 nga buy-bust money ug diha’ng nagpositibo nga namaligya ang suspek dali kini’ng gisikop.

Nakuha gikan sa posisyon sa suspek ang 11 ka gagmay nga pakete sa shabu ug gituohang improvised nga armas nga shotgun nga adunay lima ka bala. – /GMR) (BANAT NEWS)