All Saints’ Day, All Souls’ Day

CEBU, Philippines – Klaro kaayo nga ang duha ka adlaw, pasidungog kini alang sa mga Santos ug paghandom sa nangamatay natong mga minahal sa kinabuhi. Alang nako, balaan ang maong duha ka adlaw nga gigahin sa simbahan alang sa atong mga pagpangaliya.

Sa among panahon, unahon namo ang pagsimba pahinungod sa mga Santos ug mga pamisa, pag-ampo, pagduaw sa menteryo, pagdagkot og kandila, paghalad og mga bulak, alang sa mga nangamatay. Mao kini ang pagsaulog sa All Saints’ Day ug All Souls’ Day sa among panahon.

Karon, gihimo na nga diskohan ang menteryo nga murag magpiyesta, mag-picnic ibabaw sa mga lubong, magkompetensiya kinsa nga lubong ang mas hayag, mas daghang kandila ug mas daghang mahalon nga mga bulak.

Ug sa modern society, labi na ang mga adunahan, daku nilang selebrasyon ang Halloween. Ambot unsay relasyon tali sa Halloween ug sa mga Santos ug sa mga minatay?

Misunod ug miawat kita sa mga Western countries pagsaulog sa Adlaw sa mga Santos ug adlaw sa mga Kalag, diin ang maong mga nasud wala motuo nga dunay mga Santos, ug wala usab motuo sa life after death, busa, wala kinahanglana ang pag-ampo alang sa mga kalag.

Sa mga adunahan, gihimo usab kining maong duha ka adlaw sa pagbakasyon ug paglulinghayaw. Ila kini nga katungod. Whatever, unsaon man nato pagsaulog ang maong duha ka adlaw, at least, dili unta nato kalimtan ang katuyoan sa simbahan ngano nga dunay All Saints Day ug All Souls’ Day.

Maoy atong naandan ang pagduaw sa menteryo sa All Saints’ Day. Of course, daghan gihapon ang moduaw sa ilang mga patay sa All Souls’ Day.

Niining duha ka adlaw, maghuot ang mga menteryo, ug samot kagrabe ang traffic.

Mahal ang mga kandila ug mga bulak. Happy days are here again, alang sa mga nagnegosyo niini. Pahimulos gyud taman sa ginhawa.

Sa akong bahin, in case gusto mo nga mahibawo aron paglikay sa trapik ug sa kahuot sa menteryo, dili ko modungan sa kadaghanan pagduaw sa menteryo. Tulo ka menteryo ang akong duawon, sa Opon ug duha dinhi sa Cebu City.

Tulo na ka tuig nga ang akong pagduaw sa mga menteryo, sa liwas na sa Adlaw sa mga Patay. Sa ato pa, sa Nobiyembre 3 na. Gamay na lang mi nga magtikawtikaw sa menteryo, ug hayahay na ang trapiko. Makapatuyang ko og pangadye, wala’y distraction.

Try this, ug inyong ma-felt nga mas naka-“communicate” pa mo sa nangamatay ninyong mga minahal sa kinabuhi. (BANAT NEWS)