P12M shabu nasakmit

CEBU, Philippines – Dul-an P12 milyones nga kantidad sa shabu ang nasakmit gikan sa usa ka 20-anyos nga lalaki nga nibaligya og usa ka kilong gituohang shabu atol sa buy-bust operation sa City Intelligence Branch sa Cebu City Police Office kagahapon sa kaadlawon diha sa eskina sa dalan El Salvador, Tres de Abril, Barangay Labangon ning dakbayan.

Ang nadakpan mao si Genesis Ermitanio,  20, taga sitio Kalubihan, barangay Guadalupe ning siyudad.

Sumala pa ni Superintendent Romeo Santander, pangulo sa CIB ug maoy nangulo sa operasyon dihang nahinabi siya sa Banat News, idlas ang suspek ug duha ka bulan nila kining gipanid-an.

Apan kagahapon sa kaadlawon nisanong ang suspek nga palitan og usa ka kilo nga shabu bugti sa P400 mil. Tuod man gamit ang budol money natigayon ang transaksyon diha sa sud sa usa ka fastfood chain sa lugar.

Sumala pa nga nakabantay ang suspek nga polis diay iyang mga kasabot maong misirit kini og dagan apan naabtan sa unahan ug nadakpan.

Wa dayon makatuo ang kapulisan nga makahatud og usa ka kilong shabu ang suspek nianang mga orasa apan nahimo gyud kini sa suspek maong nagduda sila karon nga adunay abundang supply sa maong drugas ang agalon niini. Matud pa ni Santander, si Ermitanio usa lamang ka drug courier o tighatud sa gi-order nga drugas bugti sa P500  matag hatud.

"Kini siya sinugo lang, mao nga mo-conduct ta og deeper investigation kung kinsa gyuy amo ani niya, karon hesitant siya," matud ni  Santander.

Nasuta usab nga nadakpan na kaniadto sa Theft and Robbery Section (TRS) ang suspek tungod sa kasong pagpamusil ug nalambigit sa mga pagpanulis  diha sa Happy Valley.

Dihang nahinabi sa mga tigbalita si Ermitanio,  iyang giangkon nga nakuha sa iyang posisyon ang usa ka kilo nga shabu apan iyang giklaro nga igo ra siya gisugo. Matud pa  niya nagkalisod sila maong misulod siya sa maong illegal nga panginabuhi. Giangkon usab niini nga nalambigit siya sa pagpanulis apan kini miklaro nga dugay nato ug wala na siya mobalik sa maong binuhatan.

Matud pa niya nga ikaduha pa unta niya nga higayon nga naghatud og drugas aron panggastos sa kalagkalag ug pang-blowout kay birthday niya karong adlawa.

Si Santander mibanabana sa nasakmit nga drugas ngadto sa P11.8 milyones.  Sulod lang niining tuiga kapin na sa P20 milyones nga kantidad sa shabu ang nasakmit sa CIB.

Sa laing bahin, P232 mil nga shabu ang nasakmit sa kapolisan sa managlahing barangay sa dakbayan sa Lapu- Lapu atol sa operasyon sa miaging Huwebes.

Nadakpan sa maong mga operasyon sila si Ruben Cabatingan, 37 anyos, taga Kapatagan, Davao del Sur ug temporaryong nagpuyo sa sitio Iba, barangay Basak kinsa nadakpan sa  police checkpoint sa sitio Suba-Masulog.

Matud ni PO3 Giovanni Babano sa Basak Police Station 4 nakuhaan ang suspek og usa ka .38 caliber revolver nga may lima ka bala, lima ka gagmay’ng putos sa gidudahang shabu ug upat ka medium sized niini nga gibana-bana nga mukantidad og P106 mil.

Dugang ni Babano, nakumpiska sab nila ang usa ka timbangan, holster sa pusil ug cellphone sa suspetsado.

Sunod nga nadakpan ang manag-amahan pinaagi sa buy-bust operation sa City Intelligence Branch diha sa Purok Super Sunlight, barangay Babag .

Ang nadakpan mao sila si Efren Tampus, 31, kinsa naapil sa Top Ten Priority Drug Personality for Neutralization sa siyudad ug amahan niini nga si Rene Tampus, 50, pulos residente sa maong dapit. Nakuha gikan kang Efren ang usa ka sling bag, 22 ka gagmay’ng pakete sa shabu ug usa ka medium pack  ug P620. Samtang usa ka pouch ug laing usa ka medium size niini ang nakuha gikan ni Rene.

Gibanabanang mokabat sa P126mil ang kantidad sa drugas nga nasakmit sa maong operasyon.  (BANAT NEWS)