Polis sa kaso sa mga Chinese gikustodiya
CEBU, Philippines - Gumikan sa giingong pagtabang sa duha ka suspek sa pagpamusil patay sa duha ka Chinese Consuls ug pagkaangol sa Consul-General sa nakalabay nga semana, usa ka polis ang gipaubos karon sa camp restriction.
Si Police Officer 1 Carl Anthony Lee, nga nadestino sa Fuente Police Station ang gipaubos sa camp restriction sa Camp Sotero Cabahug.
Matud pa nga si Lee ang giingong nitabang sa duha ka suspek nga sila si Consul Li Quing ug asawa nga si Guo Jing nga makabiya sa nahitaboan. Sumala pa ni Senior Supt. Marciano Batiancela Jr., officer-in-charge sa Cebu City Police Office, nga si Lee gipaubos sa camp restriction samtang magpadayon ang imbestigasyon.
Dugang ni Batiancela nga samtang mohimo sa imbestigasyon ang Investigation and Detection Management Branch sa CCPO, dili pwede nga makagawas sa kampo ang polis nga dili mananghid.
Kini aron paghatag og dalan sa mga imbestigador nga makakuha og impormasyon sa mao’ng polis kung kinahanglan ang iya’ng pamahayag.
“So tan-awon sa na sa imbestigador kung unsa ang iya’ng lapses, ang IDMB mao’y gikuan nato,” matud ni Batiancela.
Tumong sa himuong imbestigasyon sa IDMB nga makita kung duna ba’y nahimo’ng sayop ang mao’ng polis atol sa hitabo.
“Mao na actually ato’ng gi-determine, in fact naa siya’y kaugalingong lawyer iya man sad na’ng katungod. Ipadayon pa lang gihapon na’ng pre-charge evaluation,” dugang ni Batiancela.
Niadto’ng Oktubre 21, duha ka Chinese diplomats ang namatay ug usa ka consul-general ang naangol sa pagpamusil.
Ang deputy consul-general nga si Song Rong Hua ug ang finace officer nga si Hui Li ang namatay samtang angol si Consul-General Song Rong Hua.
Ang duha ka suspek ang gikustodiya una sa CCPO apan sila nakabiya pipila ka adlaw paingon sa nasud sa China.
Usa ka adlaw human sa hitabo, ang Ministry of Public Safety ang naabot sa dakbayan sa Sugbo aron makig-alayon sa CCPO.
Gikataho’ng ang duha ka suspek ang mag-atubang og kaso sa pagpatay didto na sa nasud sa China. (Jojo C. Ugdol/GMR)(BANAT NEWS)
- Latest
