Terminal, sam-ang gisusi

CEBU, Philippines - Si Davide uban ni Bise Gobernador Agnes Magpale kinsa nisusi sa terminal nagkanayon nga ang tagdumala sa CSBT naninguha nga mahapsay ang terminal alang sa mga pasahero.

Matud ni Davide nga gawas sa hapsay, giawhag usab nila si Ramon Dumayac, operations manager sa CSBT, nga imintinar ang kalimpiyo sa terminal.

Sa laing bahin, ang mga airconditioning units sa terminal gipaandar kini aron dili mag-antus sa kainit ang mga pasahero nga maghuwat.

Seguridad

Nangunay ang director sa Police Regional Office-7, Chief Superintendent Prudencio Tom Bañas sa pagbisita sa mga lugar nga hugupanan sa mga tawo atol sa kalag-kalag.

Una’ng gibisita ang Cebu South Bus Terminal kung napahimutang na ba ang seguridad.

Gisunod ang Calamba Cemetery diin preparado na ang kapolisan nga gidestino lakip ang mga opisyal sa barangay ug mga silingan niini.

Matud sa hepe sa Cebu City Police Office, Senior Superintendent Marciano Batiancela, nga preparado na sila pagbantay sa tanang mga sam-ang sa dakbayan sama sa Calamba, Pardo, Carreta, ug Queen City Memorial Garden.

Dugang pa ni Batiancela nga tulo ka dagku’ng sam-ang ang butangan og close circuit television (CCTV) camera nga gisugdan na sa pagpanaud.

Samtang si Kapitan Yvonne Feliciano sa Calamba niingon nga tanang tanod nga duty makakompiskar sa mga ipalusot nga gidili nga butang.

Human sa Calamba gisunod pagduaw sa kapolisan ang North Bus Terminal ug katapusang gisusi sa kapolisan ang Pier 1. Giawhag ni Bañas ang katawhan nga magmatngon aron dili mabiktima sa mga badlungon.

Di magpainit

Samtang giawhag sa Department of Health ang publiko dili magdugay sa mga sam-ang ug sa huot nga lugar nunot sa grabe’ng init.

Matud ni DOH-7 Director Jaime Bernadas nga dili magpataka og palit og ilimnon ug pagkaon gumikan kay wala’y kaseguruhan kun diin kini gikan.

“Ato’ng awhagon ang ato’ng mga kaigsuonan kun mahimo lang kato’ng may edad na ug kabataan dili lang nato ipapuyo sa memorial park ug sa mga sementeryo,” matud ni Bernadas.

Subay gihapon sa kalihukan, ang Department of Environment and Natural Resources adunay hangyo sa paglabay sa basura sa sakto nga basurahan sa mga sam-ang.

Special permit

Nagpahimutang og tulo ka teams ang Land Transportation Franchising Regulatory Board diin makalukat og special permit kadto’ng mga sakyanan nga mobiyahe sa dili nila rota atol sa kalag-kalag.

Kini nahimutang sa buhatan sa LTFRB-7, North Bus Terminal ug Cebu South Bus Terminal.

Mokabat na sa usa ka gatus ang naisyuhan og special permit sa LTFRB.

Gibutyag ni LTFRB-7 Director Reynaldo Elnar nga sagad sa nikuha og special permit ang mga Ceres buses.

Ang mga sakyanan sa gobiyerno nga mohimo og libre’ng sakay dili na kinahanglan mokuha og permit gikan sa LTFRB.

Rerouting

Gidili ang pagpasulod sa mga sakyanan sa mga dalan paingon sa mga sementeryo sa dakbayan sa Mandaue sugod sa alas 6 sa buntag karong adlawa hangtud Nobiyembre 2 sa tunga’ng gabii.

Ang Traffic Enforcement Agency of Mandaue (TEAM) higpit nga motuman sa rerouting sa mga sakyanan sa paghatag og kahapsay sa mga dalan alang sa mga tawo nga mobisita sa mga lubong.

Makasulod kadto’ng sakyanan nga luwan  ang may kakulian sa panglawas apan pagawson dayun kung mahatud na ang sakay.

Giawhag sa TEAM ang mga motorista nga motuman sa mga signages aron makasubay sa rerouting. (Brenda D. Batuto, Rowena D. Capistrano, Decemay P. Padilla ug Romeo T. Limpangog/GMR)(BANAT NEWS)