Mga tour guide estriktohon

CEBU, Philippines - Ang Cebu Provincial Tourism Commission moestrikto sa mga lagda kabahin sa tour guiding, ilabi na sa pagpahigayon og canyoneering sa mga tourist spots sa kalungsuran sa probinsya aron paglikay sa disgrasya sa mga lokal ug langyaw nga turista.

Ang lakang gihimo human sa hitabo sa 21-anyos nga babaye nga nalumos human kini nag-posing ug nagpakuha’g hulagway samtang naligo sa Kawasan Falls didto sa Barangay Matutinao, Badian sa miaging adlaw.

Si Geraldine Indig dili maantigo nga molangoy mao nga naanod kini sa sulog sa tubig sa falls ug namatay.

Matud ni Bise Gobernador Agnes Magpale, pangulo sa Provincial Tourism Commission, nga bag-o lang sila nagpahimangno kabahin sa strict policy sa tour guiding ug canyoneering.

Ang PTC mopahigayon og tour guiding seminar nga dumalahon ni Baltazar Tribunalo, ang hepe sa Provincial Disaster Risk-Reduction and Management Office (PDRRMO).

Usa sa gitutokan pag-ayo sa PTC nga kanunay’ng duawon sa mga turista mao ang Kawasan Falls.

Ang PTC gikatakda nga mamalit og mga gear ug uban pa nga ekipo alang sa tour guiding ug canyoneering, kon pagsaka-saka diha sa pang-pang ug pagsulod sa mga langub pinaagi sa paghigot og pisi.

Matud ni Magpale nga niadtong milabay’ng adlaw ang PTC ug tulo ka kapitan sa lungsod sa Badian ug kapitan sa Barangay Compostela, lungsod sa Alegria nagtagbo kabahin sa estrikto nga implementasyon sa tour guiding kay ang ilang barangay anha moagi ang mopaingon sa Kawasan.

Si Magpale miingon nga kinahanglan nga dunay estrikto nga pagpatuman sa tour guiding aron malikayan ang lain pang aksidente.  (BANAT NEWS)