Batan-ong asawa gi-salvage

CEBU, Philippines - Batan-ong babaye nga buwag sa iyang bana gigapos ang duha ka tiil, gitaptapan ang baba ug gipatay sa wala pa hiilhing kriminal sulod sa kotse sa iyang bana nga gibiyaan ra daplin sa dalan Almendares, sakop sa Barangay Mabolo kaniadtong Miyerkules sa gabii.

Ang kapolisan nakakita og samad-pinusilan sa tingkoy nga bahin ni Agnelen E. Uy, 31, minyo nga adunay tulo ka anak. Ang bana sa biktima nga si Wayne Christopher Uy gisukit-sukit karon sa kapolisan kabahin sa maong hitabo.

Ang lawas sa biktima napalgan nga nagbuy-od sulod sa KIA Picanto (YDL-514) nga gipanag-iya ni Uy. Gihigtan og packaging tape ang tiil, gipapitlan og packaging tape ang baba, ug may packaging tape usab ang kamot.

Giangkon ni Uy nga nagkauban sila ug ang iyang asawa didto sa North Reclamation Area (NRA) sa Mandaue mga alas 7 sa gabii kaniadtong Miyerkules apan matud niya nga giilog sa mga armadong tawo ang iyang kotse ug gidala ang iyang asawa.

Matud ni Uy nga nagkasabot sila ug ang iyang asawa nga magkita ug magsultihanay kabahin sa ilang sitwasyon. Ang dapit sa North Reclamation Area maoy iyang gipili kay mingaw ug makalugar sila sa pagsultihanay.

Gitug-an ni Uy nga kalit lang may miabot nga mga tawo luwan sa motorsiklo ug gitionan sila’g armas. Matud ni Uy nga gipakanaog siya gikan sa kotse ug gibansan siya sa pagmaneho, dayon misirit dala ang iyang asawa.

Nakabantay hinuon ang kapolisan nga samtang si Uy miingon nga alas 7 sa gabii kini nahitabo, apan alas 10:25 na sa gabii nga si Uy nakareport ngadto sa Subangdaku Police Station.

Kini maoy hinungdan nga gipakuhaan sa kapolisan og paraffin test si Uy, gipakuhaan og fingerprints ug gisukit-sukit aron maoy basehan kun may kalambigitan ba siya pagpatay sa iyang asawa.

Nakuha sulod sa kotse ang P2,080 nga kuwarta, mga ID, tulo ka cellphones, mga bag, dako nga plastik nga may sulod nga gasolina ug usa ka bala sa 45 kalibre nga pistola ug personal nga kagamitan ni Uy.

Si Uy miadto kagahapon sa punerarya nga gidad-an sa iyang asawa aron sa pagpakisusi mao nga gidapit siya sa kapolisan sa pag-uban sa police station.

Matud ni Uy nga wala na kaayo siya masayod sa mga lakaw sa iyang asawa human sila nagkabuwag upat ka tuig na. Gani si Uy nagpa-blotter sa kapolisan pipila ka semana ang nakalabay kay siya gihulga sa iyang asawa.

Ang bana mipa-blotter sa Subangdaku Police Station niadtong Agosto 13, ning tuiga kay gihulga sa iyang asawa dihang may personal nga mga mensahe nga iyang nabasa sa cellphone sa iyang asawa.

Midugang si Uy nga gidunggab pa gani siya’g gunting sa iyang asawa ingon man ang ligid sa iyang sakyanan.

Gisusi sa kapolisan ang footage sa CCTV sa dapit nga didto gibiyaan ang kotse sa pamasin nga makatabang kini sa pag-imbestigar nila sa kaso.

Matud ni Uy nga moabag siya sa imbestigasyon ug gani iyang gitugyan sa kapolisan ang iyang cellphone. Nagtuo si Uy nga adunay laing tawo nga nalambigit sa krimen.  (BANAT NEWS)