Most wanted sa Carmen napusilan

CEBU, Philippines – Ang ikaduha nga “most wanted” sa lungsod sa Carmen naangol human kini mapusili sa mga polis kay misukol diha nga dakpon na unta siya didto sa Barangay Liburon kaniadtong miaging Martes sa gabii.

Si Fidel Banzon Roble, 55-anyos, minyo nga nagpuyo sa Barangay Liburon, napusilan sa iyang dapi-dapi sa mga sakop sa PNP Regional Intelligence Unit.

Si PO2 Jerome Quimque sa Carmen Police Station miingon nga ang mga polis gikan sa RIU-7 nga gipangulohan ni SPO2 Ramindo Elbeña ug ni Carmen Police chief John Philip Libres, may warrant of arrest aron dakpon si Roble.

Matud ni PO2 Quimque nga ang warrant of arrest giluwatan ni RTC Branch 25 Judge Sylva Aguirre Paderanga tungod sa lima ka kaso nga pagpanglugos.

Dugang pa ni PO2 Quimque nga nagpaila sila si Inspector Libres nga mga polis apan ang suspetsado milanit hinuon og armas ug misuway pagpusil sa mga polis nga modakop kaniya.

Usa sa mga polis ang nakabantay ug abtik kaayo nga mipusil ni Roble hinungdan nga nadakpan na siya sa kapolisan.

Ang dinakpan nakuhaan og usa ka kalibre .38 nga adunay tulo ka bala ug kay siya samaran man gidala sa tambalanan. – /RUB) (BANAT NEWS)