Magellan’s monument naayo na
CEBU, Philippines – Gi-turnover kagahapon sa buntag sa National Historical Commission of the Philippines ang bag-ong naayo nga Magellan’s Monument sa Liberty Shrine, Mactan, dakbayan sa Lapu-Lapu nga niliki sa linog niadto’ng Oktubre 2013.
Matud ni NHCP Chairperson Maria Sena Diokno nga kini ang una’ng lugar nga nakakompleto sa restoration project sulod sa upat ka buwan niini’ng tuiga.
Ang NCHP nigahin og P2 milyones sa pag-ayo sa monumento ug pagpanindot sa Liberty Shrine.
Matud ni Diokno nga nihangyo si Mayor Paz Radaza nga i-restore sa NHCP ang marker tupad sa Magellan’s Monument karong Nobiyembre.
Nidugang si Diokno nga ila’ng gilauman nga mahuman dayon ang pag-ayo sa kampanaryo sa Basilica Minore del Sto. Niño sa dakbayan sa Sugbo sayo sunod tuig sa dili pa ang Sinulog 2016 ug ang International Eucharistic Congress.
Si Radaza mapasalamaton sa NHCP sa pag-ayo sa monumento isip garbo sa iya’ng mga konstituwente. – /GMR) (BANAT NEWS)
- Latest
