Isyu sa edad gikataw-an ni Eddigul

CEBU, Philippines – Gikataw-an lang ni kanhi kongresista Eduardo Gullas ang awhag ni Mayor Johnny de los Reyes nga papahuwayon na siya tungod sa pangedaron.

“Lumba diay ni sa dagan pero pwede ra man pud ug mao na ang criteria pagka-mayor kay pwede ra man ko bisan basketball, swimming o dagan,” matud ni Gullas.

Apan iya’ng gipasabot nga dili kana mahitabo tungod kay serbisyo sa publiko man ang hisgutan labi na sa natad sa pagpapili sa pagka-mayor.

Gikataw-an sab ni Gullas ang plano ni JVR nga siya kuhaon isip adviser kung siya modaug sa ikaduha’ng termino hinuon nagpasalamat siya sa mayor.

Giangkon ni Gullas nga mahimo’ng isyu gyud batok kaniya ang iya’ng pangedaron apan dili matag-an ang huna-huna sa mga botante.

“I feel stronger man gani kung buot huna-hunaon,” asoy ni Gullas kinsa makig-atbang kang JVR sa umaabot eleksiyon.

Alang ni Gullas nga ang Talisaynon ang mamili ug mohukom kung kinsa nila nga kandidato ang makahatag og dugang pundasyon sa siyudad.

Si Gullas ang nagduso nga mahimo’ng siyudad ang dakbayan sa Talisay.

Siya usab ang nakapatukod sa 17 ka eskwelahan sa mga barangay sa Talisay ug uban pa’ng mga proyekto nga napahimuslan sa katawhan.

Lakip sa iya’ng napatukod ang Talisay City College diin daghang kabus nga pamilya ang nakapahimulos tungod sa kabarato sa tuition fees ug duol ra. – /GMR) (BANAT NEWS)