Isko himuong no. 1 sa Talisay

CEBU, Philippines – Nibisita sa dakbayan sa Talisay ang bise mayor sa siyudad sa Manila nga kandidato sa pagka-senador kagahapon sa buntag.

Gidawat si Bise Mayor Isko Moreno nila ni Bise Mayor Romeo Villarante, Konsehal Danny Caballero ug Aldin Diaz nga sakop sa Nationalist People’s Coalition (NPC). Si Moreno ang nagsilbi’ng guest speaker sa mga empleyado sa City Hall atol sa ila’ng flag raising ceremony.

Si Moreno nipabuhagay nga ang iya’ng pagdagan sa pagka-senador tumong nga mapalapdan ang iya’ng pagserbisyo.

Siya niingon nga ang pagserbisyo sa katawhan ang labing nindot nga trabaho gumikan kay makahatag kini og kalipay sa mga tawo nga matabangan.

Iya’ng prayoridad ang edukasyon ug panglawas tungod kay mao kini ang iya’ng nasinati samtang siya naa pa sa lisud nga kahimtang.

Human sa flag raising gipatawag si Moreno ni Mayor Johnny de los Reyes sa iya’ng opisina. Si JVR nga sakop sa Liberal Party (LP) ang nipadayag sa iya’ng suporta sa senador.

Samtang si Villarante nibutyag nga ila’ng paningkamutan nga si Moreno ang mahimo’ng number one nga senador sa Talisay tungod sa iya’ng pagkaila niini nga tinud-anay nga tawo.

Matud ni Villarante nga nagkauban sila ni Moreno sa Vice Mayors’ League of the Philippines.

Si Caballero nibutyag usab nga si Moreno ang dili lisud estoryahon tungod sa iya’ng karisma nga pang-masa ug mas nisamot ang iya’ng bilib sa opisyal human nakahimamat nila kini og dugay.

Mapasalamaton si Moreno sa pagdawat sa mga opisyal sa Talisay kaniya. – /GMR) (BANAT NEWS)