Missing napalgan patay na

CEBU, Philippines – Human sa duha ka adlaw nga pagka-missing, napalgan ang patay’ng lawas sa usa ka 37-anyos nga lalaki sa kalibonan kagahapon sa buntag sa sitio Laya, Upper Kalunasan, dakbayan sa Sugbo.

Ang patay’ng lawas sa biktima nga si Benjie Apusaga, residente sa mao’ng lugar, ang anaa na sa state of decomposition ug halos dili na mailhan.

`Matud sa mga igsuon sa biktima nga sila si Analie Solis, 24, ug Annabelle Belandres, 31, nga katapusan nila’ng nakit-an ang ila’ng igsuon niadto’ng Sabado sa buntag nga niagi sa ila’ng panimalay.

Diha’ng nibalik kini nahibulong na lang sila tungod kay nagdala na man og sako.

Nagtuo ang magsuon nga igo lang kini nagkuha og bas kay mao na man kini ang iya’ng nahimo’ng trabaho.

Apan niabot ang kahapunon wala na nila igkita ug ang inahan nila nagsige og pangita kun hain ang ila’ng maguwang mao’ng ila’ng gisuhid ang palibot apan wala gyud nila nakit-i ug mao na lang ang ila’ng nahibaw-an kagahapon sa buntag nga patay na kini. Sigun sa magsuon nga dunay bisyo ang ila’ng igsuon ug kini mao ang paggamit og ilegal nga drugas.

Sigun  ni PO3 Cristobal Geronimo sa Homicide Section sa Cebu City Police Office nga dunay samad sa wala’ng bahin sa ulo ang biktima.

Ila’ng ipaubos sa autopsy ang patay’ng lawas aron masayran kun ang samad agi ba sa pinusilan.

Base sa pamahayag sa mga kabanay sa biktima nga daghan kini og kontra ug kapila na gisumonan apan matud pa dili kini motambong.

Dili usab nila ma-establisar kun may kalambigitan sa ilegal nga drugas ang pagkamatay sa biktima human ang mga tawo sa dapit wala’y ma-istorya. – /GMR) (BANAT NEWS)