Priso karon jail guard na
CEBU, Philippines – Nahimo’ng usa ka jail guard sa Cebu Provincial Detention and Rehabilitation Center (CPDRC) ang usa ka kanhi piniriso.
Si Timoteo Lucernas, taga isla sa Camotes ug napriso kaniadto sulod sa 11 ka tuig sa kaso’ng pagpanglugos, ang usa sa 19 nga bag-ong guwardiya nga gidawat sa Kapitolyo.
Si Lucernas nanghinaut nga magsilbi siya’ng modelo sa mga inmates sa CPDRC ug buot usab niya’ng makatabang sa Kapitolyo pinaagi sa paghatag og maayo’ng serbisyo isip jail guard.
Ang mga bag-ong jail guards mga license criminologists ug gradwado sa mga unibersidad sa Sugbo.
Sila ang gihulip sa mga niretiro’ng jail guards sa nilabay’ng buwan sa Agosto.
Si Marco Toral, Capitol consultant sa CPDRC, nagkanayon nga ang mga bag-ong jail guards ubos pa kini sa watchman status sulod sa tulo ka buwan.
Gipaubos sila sa usa ka buwan nga rigid training course lakip na ang kabahin sa hostage taking incident sulod sa prisohan.
Si Toral kinsa usa sab ka inmate sulod sa pito ka tuig niawhag sa mga bag-ong trainees nga magmatinud-anon ug magsilbi’ng example sa mga mosunod pa nga jail guards. – /GMR) (BANAT NEWS)
- Latest
