Barangay Kagawad gipusil human namulong
CEBU, Philippines – Grabeng naangol ang usa ka barangay kagawad human kini gipusil human siya namulong atubangan sa mga tawo sa gipahigayon nga programa atol sa pista sa ilang kapilya sa barangay Anapog, diha sa lungsod sa San Remigio Sabado sa gabii.
Si Police Officer 1 Felipe Cabaque sa San Remigio Police Station miila sa biktima nga mao si Kagawad Norlan Periago Pagal, 43, nagpuyo sa maong dapit.
Matud pa ni Cabaque nga pipila lamang ka gutlo gikan siya namulong gisundan kini sa duha ka wala hiilhing tawo ug kalit lang gipusil sa iyang bukobuko hinungdan sa grabeng pagkaangol niini. Ang duha ka wala hiilhing lalaki daling miikyas ug wala na maabti pa sa mga polis nga mitubag sa maong alarma.
Ang biktima daling gidala sa usa ka tambalanan sa dakbayan sa Sugbo samtang padayon pa ang imbestigasyon pag-ila sa mga gikatahapan ug ang motibo sa maong pagpamusil. – /EIM) (BANAT NEWS)
- Latest
