192 polis wa makapaso

CEBU, Philippines – Nagkaguliyang ang mga polis nga nag-schooling sa Regional Training School 7 sa Barangay Jugan, Consolacion tungod kay katunga sa ilang klase ang gikatahong wa gipapaso atol sa ilang graduation rites niadtong Biyernes sa buntag.

Si Rose (dili tinuod pangalan) kabanay sa usa ka polis nga wala makapaso midangop sa Banat News ug mipabuhagay sa iyang kasagmuyo sa nahitabo.

Nakurat siya ug ang ubang nanambong atol sa graduation rites kay didto na sila gipahibawo nga di diay makapaso ang ilang giadto.

Ang gieskwelahan sa maong 338 ka mga polis mao ang Public Safety Junior Leadership Course, nga gikinahanglan sa promosyon aron mosaka ang ranggo ngadto sa Senior Police Officer 1 gikan sa ranggo nga Police Officer 3.

Usa sa mga polis nga wala makapaso nga nakahinabi ang Banat News apan nagdumili pagpaila sa iyang kaugalingon miingon nga usa siya sa nakadawat og kamandoan ug gipangayoan siya og written explanation nganong nipalta siya sa “Honors Night” niadtong Huwebes.

Matud pa niya nga sa pagkabuntag niana nag-practice pa sila alang sa graduation rite apan wala siya makahibawo nga niabot diay og lapas sa katunga sa ilang klase ang mipalta sa maong kalihokan.

Ang iyang rason nganong wala siya makatambong sa kalihokan nianang Huwebes sa gabii tungod kay mipauli siya sa ilaha aron nga makabayad siya sa iyang obligasyon sa RTS ug aron usab makuha iyang pamilya aron makatambong sa graduation rites.

Apan sa graduation rites igo ra silang giingnan nga dili sila makapaso ug way gihatag nga eksplinasyon kun ngano.

Apan si Superintendent Edwelito Rosales, RTS-7 director, nga nahinabi sa Banat News miingon nga bisan wala makapaso ang katunga sa klase wa ni magpasabot nga di na sila maka-graduate. Matud pa niya nga may board sila nga giumol aron tan-awon kun balido ba ang eksplinasyon sa mga mipalta sa maong kalihokan.

Apan iyang giklaro nga ang ilang dawatong balidong rason mao lamang kadtong adunay court duties ug kadtong nasakit ug nadala sa ospital niadtong mga orasa.

Ang Honor’s Night usa ka major activity sa training ug ang ilang pagpalta dakong kalapasan sa training manual sa RTS ug may tukma kini nga silot. Matud pa niya miabot og 192 ang mipalta sa maong kalihokan hinungdan nga mihimo dayon siya og tukmang aksyon tungod kay sukad sa kasaysayan sa RTS sa tibuok nasod, karon pa nahitabo nga katunga sa police trainees ang mipalta sa maong kalihokan.

Nasayran sa Banat News nga gipatawag sa kadagkoan sa RTS7 ang mga wala makapasong mga polis karong adlawa aron masayran ang resulta sa imbestigasyon nga gihimo sa board. – /EIM) (BANAT NEWS)