Dalagita gidagit naluwas

CEBU, Philippines – Nasikop sa mga polis ang usa ka lalaki nga gipasanginlan nga midagit sa usa ka 16-anyos nga dalagita aron himuon niini nga kapuyo diha sa barangay Mojon sa lungsod sa Bantayan sa Isla sa Bantayan.

Ang maong lalaki naila nga si Dante Desabelle, 28, taga Doong sa nahisgutan nga lugar.

Sumala pa ni Police Officer 2 Joseph Dela Cerna, desk officer sa kapolisan sa maong lungsod, ang ginikanan sa babaye mi-report sa kapolisan nga gidagit ang ilang anak sa suspek. Matud pa nga gipugos   pagpakuyog sa suspek ang dalagita gikan sa usa ka gamay nga isla sa Bantayan ug gidala sa Bantayan island.

Sa pag-adto nila sa lugar, ang mga residente mitultol kun asa gidala sa suspek ang dalagita hinungdan sa pagkaluwas niini ug pagkasikop sa suspek. Ang suspek nakuhaan og duha ka paketeng shabu ug drug paraphernalia. Matud pa ni Dela Cerna nga dili uyab ang duha.

Pasakaan og kasong forcible abduction ang maong suspek ug kasong kalapasan sa Comprehensive Dangerous Drugs Act of 2002. (/EIM)  (BANAT NEWS)