Mga mag-uuma hatagan og kabaw ug baka

CEBU, Philippines – Adunay 180 ka pamilya sa lainlaing dapit sa probinsya sa Sugbo ang makadawat og similya nga kabaw ug baka aron kini makatabang sa ilang panginabuhian. Usa kini ka proyekto sa Provincial Veterinary Office (PVO) sa probinsya sa Sugbo nga gidumala ni Dr. Mary Rose Vincoy.

Matud ni Vincoy nga ang ipanghatag mao ang 60 ka kabaw nga magamit sa pagdaro, 110 ka baye nga baka aron paanakon ug 10 ka “dairy cow” nga kakuhaan og gatas nga mahimong ikabaligya.

Karong sunod buwan ang pagpanghatag sa mao nga mga kabaw ug baka ngadto sa mga kwalipikado nga mag-uuma. Ang mga beneficiary kinahanglan nga sakop og kapunongan sa mga mag-uuma ug nakasalmot og training sa pag-atiman og hayop, ug nagtanom sila’g mga sagbot nga pagkaon sa hayop.

Patukuron usab og payag ang mga mag-uuma nga pasilongan sa hayop. Ang nakabenepisyo sa hayopan kinahanglan nga mohatag sila ngadto sa gobiyerno og usa ka anak sa hayop nga gitugyan ngadto kanila.

Human sila makahatag og usa ka anak sa hayopan hatagan na sila og certificate of ownership pagmatuod nga ilaha na ang maong hayop. (/RUB) (BANAT NEWS)