2 patay, 21 angol

CEBU, Philippines – Duha ang namatay ug 21 ka tawo ang naangol dihang ang usa ka mini bus nga pasaheroan gikan sa lungsod sa Carmen ang kalit nabangga ngadto sa duha ka Suzuki jeepney nga pasaheroan sa dalan M. C. Briones, eskina barangay Basak ug barangay Canduman, sa dakbayan sa Mandaue kagahapon sa buntag.

Si Police Officer 2 Ruben Dayon sa traffic division sa Mandaue City Police Office (MCPO) miila sa namatay nga mao si  Edwin Rago, nagpuyo sa maong dapit ug usa ka wa pa mailhing babaye nga kasarangan ang gidak-on sa lawas ug pamarog nga giingong  nag-jogging  nga nagdagan padulong sa Consolacion.

Matud pa ni Dayon ang minibus gimaneho ni Antonio Abatayo, taga Poblacion, Carmen.

Paingon sa dakbayan sa Sugbo ang mini bus apan samtang nagdagan gikatahong nawad-an kini og brakes hinungdan nga nadasmagan niini ang nagbisekleta nga si Rago nga nakaingon sa kamatayon sa biktima.

Human kang Rago napunggit usab ang babaye nga nag-jogging daplin sa dalan  nga nakabsan usab sa iyang kinabuhi.

Wa pa gyud mohunong ang minibus ug nadasmagan niini ang duha ka pasaheroan hinungdan sa pagkaangol sa 21 ka mga pasahero niini una pa nasampak sa poste.

Ang 21 ka mga pasahero dali nga gidala sa Emergency Rescue Unit Foundation (ERUF) ug Accident Control Emergency Response Team (ACERT) ngadto sa Mandaue City Hospital ug Vicente Sotto Memorial Medical Center.

Matud pa ni Jerome Dumpor, usa sa mga pasahero sa mini bus nga nahinabi sa Banat News, hinay ra kaayo ang dagan sa ilang gisakyan apan pag-abot sa dulhogan nga lugar, kalit lang nawagtangan og preno ang ilang gisakyan ug kapila sila nalubag hangtod nga nadaro ang duha ka tawo ug duha ka pasaheroan.

Sumala pa ni Dumpor, adunay pipila ka mga pasahero ang naputlan gayud sa ilang tiil ug nagrabehan sa maong aksidente.

Si Rodolfo Davidon, operator sa maong mini bus, nitug-an sa Banat News nga andam sila moabaga sa gastos sa mga biktima tungod kay usa man kini ka aksidente.( /EIM) (BANAT NEWS)