Pagpamutol sa mangga gipahunong
CEBU, Philippines - Gipahunong sa Mandaue City Environment and Natural Resources Office ang pagpamutol sa mga punoan sa mangga sa barangay Tabok tungod sa kakuwang sa permit.
Si Placido Jerusalem, acting head sa CENRO, niingon nga ang piniyalan sa luna nga gipanag-iya sa LTGH Food Industries, Inc. napakyas sa pagpakita og permit gikan sa Department of Environment and Natural Resources.
Lakip sa naputol na ang 50 ka punoan sa mangga nga giputolputol na.
Si Jerusalem niingon nga adunay application nga giduso sa CENRO-DENR-7 apan wala pa gyud kaaprobahi.
Matud pa ni Jerusalem nga ang kanhi tag-iya sa luna ang ni-apply sa permit.
Si Jerusalem niingon nga nahitabo ang pagpamutol sa mga dagku’ng punoan sa mangga niadto pa’ng niagi’ng semana apan nahidangat ngadto sa iya’ng buhatan ang taho niadto lang niagi’ng adlaw.
Ubos sa balaud, silot gikan sa unom ka buwan o unom ka tuig nga pagkabilanggo o multa nga P500 ngadto sa P5,000 ang ipahamtang sa pagpamutol sa kahoy nga wala’y permit. (Romeo T. Limpangog/GMR)(BANAT NEWS)
- Latest
