3 chinese gipamusil

CEBU, Philippines - Duha ka Chinese ang kompirmadong patay ug usa ang nasamdan sa nahitabong pagpamusil sa mga sakop sa Chinese diplomatic corps nga nangaon kagahapon sa udto sulod sa Light House Restaurant, General Maxilom Avenue Cebu City.

Ang nakalas giila sa kapolisan nga sila si Sun Shan, usa ka protocol officer ug Hui Li, nga finance officer sa Peoples Republic of China, Chinese Consular office nga nagbase dinhi sa Sugbo.

Samtang nasamdan mao ang Chinese Consul General nga si Song Ronghua kinsa naigo sa iyang kamot.

Nadakpan usab dayon sa kapolisan ang gituohang suspetsado nga magtiayong sila Li Qing Liang, 60 anyos, Chinese Consul ug iyang asawa nga si Gou Jing pulos nagpuyo sa Avalon Condominium.

Matud pa sa usa ka trabahante sa maong kan-anan nagpa-reserve ang maong grupo og 12 ka  tawo, apan siyam lang ang nag ulhos-ulhos og pangabot  diha sa function room tungod sa pagsaulog sa adlaw nga natawhan sa usa nila ka kauban.

Apan dangtan pila ka gutlo, nakadungog na lang sila og sagunson nga buto  gikan sa function room maong daling nisud ang usa ka staff kay nagtuo nga adunay nangatagak nga butang.

Nakugang na lang kini nga nangahagba na ilang guest ug nagkadugo, hinungdan nabulabog ug nag-iyahay og dagan paggawas ang mga nangaon. Si Ronnie Dacua, security guard nga nadestino sa gawas nibutyag nga nakadungog siya og buto-buto apan wala siya miresponde sa sud kay niungot ang hammer sa iyang armas maong nagpaabot na lang siya sa gawas.

Apan siya mitug-an nga iyang nabantayan nga adunay nigawas nga magtiayong Chinese nga maoy nagpahibalo kaniya nga adunay pinusilay nga nahitabo sa sulod hinungdan iya na lang gibantayan nga walay laing makagawas.

Nitawag siya sa kapolisan ug ambulansiya ug daling gipangdala sa Chong Hua Hospital ug Perpetual Soccuor Hospital ang mga biktima.

Sumala pa ni Superintendent Romeo Santander, hepe sa City Intelligence Branch nga usa sa niresponde sa dapit, nakabsan sa kinabuhi si Li tungod sa samad pinusilan sa ulo, samtang si Shan naigo sa iyang lusong-lusong nga mao say naingnan sa iyang kamatayon.

Tungod sa nakuhang kopya sa footage sa CCTV na-trace nila nga ang managtiayon maoy namusil sa mga biktima.

Matud pa ni Santander nakuha sa CCTV nga adunay mainitong panaglalis nga nahitabo tali sa mga biktima ug sa mga suspek.

Ang duha nadakpan dayon inabagan sa mga nakasaksi nga positibong miila kanila ug nakuhaan usab og usa ka ‘paltik’ Colt Defender .45 caliber pistol apan walay sulod nga magazine nga adunay Serial No. 126238.

Ang CCPO mokuha pa og interpreter aron ilang masayran kung unsay hinungdan sa panaglalis nga nakaingon sa pagpamusil. Samtang ang mga suspek wala pa gihapon makuhai sa ilang mga pamahayag.

Nasayran sa Banat News nga si Consul General Ronghua dili pa dugay niasumir sa iyang posisyon. (BANAT NEWS)