3 ka bata missing pa gihapon

CEBU, Philippines – Nagpabiling missing ang tulo ka mga batang nangisda sukad pa niadtong Domingo ug nabalda pa gyud ang search and rescue operation tungod sa dagkong bawod ug kusog nga hangin nga nakapalisod sa mga nangita kanila.

Si Andy Berame sa Lapu-Lapu City Disaster Risk Reduction Management nagkanayon nga dili pa sila makalusad og search operations tungod sa gale warning.

Apan miawhag si Berame ngadto sa mga silingang lungsod o siyudad nga daling mo-report sa Olango Police Station kun aduna silay mabangalang tulo ka mga bata nga na-missing samtang namasol sa dagat. "Dili man ta ka-ontrol sa dagan sa panahon, ang gihimo sa police sa pagkakaron, ilaha gipanawagan tanan police stations dili lang sa Lapu-Lapu City kundi sa mga nearby municipalities, in case duna sila'y makit-an nga modunggo o mapadpad sa ilahang dapit, mo-feedback sila balik sa Olango police station," matud ni Berame.

Sila si Jose Maria Eduardo Refullino, Aaron Hida parehong nagpangidaron  og 15 anyos ug si Shaun Michael Daño, 9 anyos, mga residente sa barangay Baring sa isla sa Olango ang mga nagpabilin nga missing sukad sa miaging Domingo sa hapon.

Sa pakighinabi ni Senior Police Officer 1 James Ariel Fuentes sa Olango Police Station sa Banat News, adunay mga police personnel ang miadto sa Camotes kagahapon sa buntag sa pamasin nga napadpad ra ang mga bata didto sama sa nahitabo sa tulo ka Korean technical divers nga nakit-an nga naglutaw sa maong isla tulo ka adlaw human sila na-missing diha sa Mactan.

Wa isalikway ni Berame nga posibleng napadpad ang mga bata sa dakbayan sa Talisay o sa gagmay’ng isla sa Bohol. "Dako ang posibilidad kay prevailing winds nato ron kay amihan unlike sa una nga time sa habagat," dugang ni Berame.

Sa laing bahin, si Bise Mayor Romeo Villarante sa siyudad sa Talisay nagkanayon nga angayan gyud nga ibalhin ang mga nagpuyo daplin sa kadagatan aron malikay sila sa peligro matag bati ang panahon.

Matud pa ni Villarante nga magbalik-balik ra ang suliran sa mga nagpuyo sama sa nahitabo niadtong Domingo diin kusog nga hangin nga nimugna og dagkong bawod hinungdan sa kahasol sa katawhan kay naabot na sa ilang balay ang bawod. – /EIM) (BANAT NEWS)