13 naaktohan nagsuyop sikop

CEBU, Philippines – Nasikop sa kapolisan ang 13 ka tawo nga naaktohan nga nagsuyop og shabu sa Estaca, Compostela ug Sabang, dakbayan sa Danao sa managlahing takna nga kinalit nga pagronda.

Senior Police Officer 3 Pedro Enriquez sa Compostela Police Station niila sa unom ka tawo nga ila’ng nadakpan nga nag-pot session sa usa ka payag nga sila si Arnold Lawas, 24; Apolinario Tapia, 33; Gretcen Mangubat, 29; Gojune Olivar, 26; Edmar Sabate, 31 ug Berly Caballo, 37, nga nagpuyo sa mao’ng dapit.

Matud ni Enriquez nga nakadawat sila og pahibawo gikan sa nagpakabana nga molupyo labot sa ila’ng namatikdan nga grupo sa mga lalaki ug pipila ka babaye nga nagsuyop og shabu.

Ang ila’ng hepe sa Compostela Police Station nga si Senior Inspector Romeo Caacoy ang nangulo sa pakisusi ug ila’ng naabtan ang grupo sa mga lalaki nga nagsuyop og shabu apan ang uban kanila ang naka-eskapo apan unom gyud ang ila’ng nagunitan.

Nasakmit nga mga ebidensiya gikan sa mga nadakpan ang pito ka gagmay nga pakete’ng shabu ug kahimanan sa paggamit niini.

Samtang ang team sa kapolisan sa dakbayan sa Danao nga gipangulohan ni Police Officer 3 ang nagmalampuson usab sa pagronda sa sulod sa usa ka payag sa barangay Sabang diin ila’ng nasikop ang pito ka tawo nga nagsuyop og shabu.

Naglakip sa ila’ng nadakpan mao sila si Saturnino Lawas Lauro, 52; Eddiegie Valiente Boston, 23; Jessie Ponce, 31; Gregorio Capoy Jr., 45; Glenn Almadin ug Niel Cal, 40, pulos nagpuyo sa Sabang. Matud ni Senior Police Officer 3 Ildefonso Prosia sa Danao City Police Station nga naaktohan gyud nila ni PO3 Fiel Restauro ug mga kauban ang mga dinakpan nga nagsuyop og shabu sa usa ka bakante’ng payag sa mao’ng dapit.

Nunot sa pagkasikop sa mga suspek mao’y nasakmit ang mokabat sa 32 gramos nga shabu ug drug paraphernalia. - /GMR) (BANAT NEWS)