Motor napasok sa van, drayber patay
CEBU, Philippines – Patay ang usa ka motorista nga napasok ilawom sa gikasugat nga wing van nga sakyanan sa Looc, dakbayan sa Danao alas 11 pasado sa niagi’ng Sabado sa gabii.
Si Police Officer 1 Joseph Olidon, traffic field investigator sa Danao City Police Station, niila sa namatay nga si Jobe Tamis, 29, taga dalan Jayme, Bakilid, dakbayan sa Mandaue.
Matud ni Olidon nga gikan sa lungsod sa Carmen ang biktima nga nagsakay sa iya’ng motorsiklo ug padulong na unta pauli sa ila’ng panimalay sa dakbayan sa Mandaue.
Dugang ni Olidon nga kalit lang ni-overtake sa gisundan ug napunggit sa gikasugat nga wing van nga gimaneho ni Benjie Solayao, 23.
Gumikan sa kakusog nga impact sa bangga, ang motorsiklo nga giluwanan sa biktima ang napasok ilawom sa ligid sa van ug nadaro ngadto sa unahan nga gibanabana nga 10 metros ang gilay-on sa dalan.
Si Olidon niingon nga nakaangkon gyud og grabe’ng kadaut sa iya’ng kalawasan ang biktima ug dali kini’ng gidala sa Danao Provincial Hospital apan gideklarar nga dead on arrival.
Ang patay’ng lawas sa biktima temporaryo’ng gipahiluna sa usa ka puneraya sa dakbayan ug ang daryber sa van ang nitahan sa kapolisan. - /GMR) (BANAT NEWS)
- Latest
