Namintal sa balay nakuryentehan

CEBU, Philippines – Patay ang usa ka batan-on human nakuryentehan samtang namintal sa kisame sa balay sa usa ka retirado’ng polis nga iya’ng gitrabahoan sa New Imus Road, Lorega, dakbayan Sugbo sa niagi’ng hapon.

Si Kent “Kentoy” Alburo, 19, taga San Fernando, Cebu ug usa ka pintor ang nakabsan sa iya’ng kinabuhi human nakasaghid og tubo nga adunay sulod nga live-wire samtang siya namintal.

Matud ni Senior Police Officer 1 Wetzel Berry, imbestigador sa Cebu City Police Office-Homicide Section, nga si Alburo gikuha ni Felipe Sosmeña, 50, usa ka retirado’ng polis, aron sa pagpintal sa iya’ng balay nga bag-o lang napatukod og balik sukad sila nasunugan.

Sa pagpakighinabi sa mga imbestigador sa menor de edad nga kauban ni Alburo kini nitug-an nga samtang nagtrabaho sila sa ikatulo nga andana sa balay, si Alburo nipatong nga nagtiniil sa railings sa may veranda aron unta sa pagpintal sa kisame. Apan matud pa nga samtang kini namintal, nasaghiran niini ang tubo nga adunay live wire nga giingong naka-connect sa poste sa Visayan Electric Company ug gipapilit sa semento nga firewall nga naa sa kilid.

Sigun ni Berry nga hapit pud kini mahulog sa yuta ug maayo na lang nga nasawo sa kauban.

Dali kini nga gidala sa Cebu City Medical Center apan patay na kini sa pag-abot sa tambalanan.

Hinuon matud ni Berry nga si Sosmeña andam mohatag og tabang ngadto sa pamilya ni Alburo. - /GMR) (BANAT NEWS)